«Հակասում է Պրահայի և Սոչիի համաձայնագրերին»․ Հաջիզադեն՝ Փաշինյանի հայտարարության մասին

Ադրբեջանի արտաքին գործերի նախարարության մամուլի քարտուղար Այխան Հաջիզադեն, ի պատասխան Հայաստանի վարչապետ Նիկոլ Փաշինյանի հայտարարության, նշել է․

«Աբսուրդ է, որ Հայաստանը, որը ոչ միայն ոչնչացրել է ադրբեջանցիներին պատկանող գույքը թե՛ իր տարածքում, թե՛ 30 տարի օկուպացիայի տակ պահած քաղաքներում ու գյուղերում, այլև ապօրինի կերպով հայերին վերաբնակեցրել այդ տարածքներում, դեմ է բնակեցման քաղաքականությանը, որն իրականացվում է Ադրբեջանի կողմից իր ինքնիշխան տարածքների և պատմական հողերի վրա։ Այս հայտարարությունն ուղղակիորեն հակասում է նաև Պրահայի և Սոչիի համաձայնագրերին, որոնց հղում է անում Հայաստանը»,- ասել է ագրեսոր երկրի ԱԳՆ մամուլի քարտուղարը։

Հիշեցնենք՝ Փաշինյանն այսօր հայտարարել էր, որ Ադրբեջանը Թալիշում հայերին պատկանող տները քանդում և կառուցում է ադրբեջանցիների համար նախատեսված տներ։