Միրզոյանն ու ՄԱԿ Մարդու իրավունքների խորհրդի նախագահը հանդիպել են. ինչ են խոսել

Ադրբեջանի առավելապաշտական, ուժի կամ ուժի սպառնալիքի կիրառմանն ուղղված մոտեցումները տարածաշրջանում կայունությունն ու անվտանգությունը խաթարող հիմնական գործոններն են: Այս մասին ասել է ՀՀ արտգործնախարար Արարատ Միրզոյանը ՄԱԿ Մարդու իրավունքների խորհրդի նախագահ, Ժնևի ՄԱԿ գրասենյակում Արգենտինայի մշտական ներկայացուցիչ Ֆեդերիկո Վիլեգասին, հայտնում է ԱԳՆ մամուլի ծառայությունը։

Միրզոյանը զրուցակցին է ներկայացրել Ադրբեջանի կողմից Լաչինի միջանցքի բնականոն գործունեության խափանմանն ուղղված քայլերի հետևանքով ստեղծված իրավիճակը և դրանից բխող վտանգները:

Զրուցակիցներն անդրադարձել են «Ընդդեմ ցեղասպանության հանցագործության» Չորրորդ գլոբալ ֆորումին։

«ՀՀ ԱԳ նախարարն ընդգծել է, որ Հայաստանը՝ որպես ցեղասպանության արհավիրքը վերապրած ժողովուրդ ներկայացնող պետություն, ամենաակտիվ կերպով ներգրավված է ցեղասպանության և մարդկության դեմ ուղղված այլ հանցագործությունների կանխարգելման օրակարգի առաջմղման գործում»,– նշված է հաղորդագրության մեջ։

Միրզոյանն ու Վիլեգասը խոսել են վերջին 3 տարիներին Հայաստանի` Մարդու իրավունքների խորհրդում ծավալած գործունեությանը։ Անդրադարձել են Հայաստանի և Արգենտինայի միջև առկա սերտ համագործակցությունը, այդ թվում` մարդու իրավունքների ոլորտում։