ԵՄ երկրները պետք է կրկնապատկեն իրենց պաշտպանական ծախսերը. Էստոնիայի ԱԳ նախարար
Եվրոպական երկրները պետք է կրկնապատկեն իրենց պաշտպանական ծախսերը Ուկրաինայի պատերազմի պատճառով։ Այս մասին հայտարարել է Էստոնիայի արտաքին գործերի նախարար Ուրմաս Ռեյնսալուն՝ հավելելով, որ իր երկիրը նախատեսում է ազգային պաշտպանության ծախսերը հասցնել ՀՆԱ-ի 3 տոկոսի, հայտնում է Reuters-ը։
Ռեյնսալուն մի շարք երկրների գործընկերների հետ այցելել է Կիեւ։
«Մենք կցանկանայինք, որ եվրոպական երկրները կրկնապատկեն իրենց պաշտպանական ծախսերը ուկրաինական պատերազմի ժամանակ եւ պատերազմից հետո, եւ մենք պատրաստվում ենք մեր ՀՆԱ-ի 3 տոկոսը ծախսել ազգային պաշտպանության վրա»,- ասել է նա։
Ռեյնսալուն նշել է, որ ԵՄ-ն պետք է նաեւ մեծացնի ֆինանսավորման մակարդակը, որը նա հատկացնում է Ուկրաինային ռազմական աջակցությանը։ «Եվրամիությունն ընդհանուր առմամբ իր ՀՆԱ-ի մոտ 0,2 տոկոսը հատկացրել է Ուկրաինային ռազմական օգնության համար, եւ ես խոստացել եմ, որ եթե մենք կարողանանք հասնել 1 տոկոսի, դա մեծ նշանակություն կունենա եւ կփոխի պատերազմի ընթացքը»,- ասել է նա։
Ուկրաինայի վարչապետ Դենիս Շմիգալը Twitter-ի իր էջում գրել է, որ Ռեյնսալուի եւ վեց այլ նախարարների այցը ներառում է ԵՄ-ի պատժամիջոցների ավելի խստացման քննարկում, Ուկրաինայի էներգետիկ ենթակառուցվածքի վերականգնում, ֆինանսական աջակցություն եւ Ուկրաինայի «եվրատլանտյան ձգտումներ»:
