Իտալիայի առաջին կին վարչապետը հայտարարել է իր կաբինետի կազմը
Իտալիայում երկրի պատմության մեջ առաջին կինը՝ վարչապետ Ջորջա Մելոնին այսօր ընդունել է կառավարություն ձեւավորելու մանդատը։ Նոր կառավարության երդմնակալությունը տեղի կունենա հոկտեմբերի 22-ին։
Ինչպես հայտնում է Kp.ru-ն, նա հայտարարել է իր կաբինետի կազմը։ Նշվում է, որ նախարարական պորտֆելների մեծ մասը բաժին է հասել նրա «Իտալիայի եղբայրներ» կուսակցության ներկայացուցիչներին։ Սակայն կառավարությունում պաշտոնների մի մասը բաժին է հասել «Լիգա» և «Առաջ, Իտալիա» կուսակցությունների ներկայացուցիչներին, որոնք «Եղբայրներ»-ի հետ միասին հաղթել են սեպտեմբերի 25-ին կայացած ընտրություններում՝ աջ կենտրոնամետ կոալիցիայի կազմում։
Այժմ փոխվարչապետների պաշտոններ են ստացել «Լիգայի» առաջնորդ Մատեո Սալվինին և «Առաջ, Իտալիա»-ի փոխնախագահ, Եվրախորհրդարանի նախկին նախագահ Անտոնիո Տայանին։ Նրանցից առաջինը դարձել է ենթակառուցվածքների և տրանսպորտի նախարար, երկրորդը ստացել է երկրի արտաքին գործերի նախարարի պաշտոնը։
Ներքին գործերի նախարարության ղեկավարի պաշտոնում նշանակվել է տեխնիկական մասնագետ՝ Հռոմի պրեֆեկտ Մատեո Պիանտեդոսին, իսկ Ջանկառլո Ջորջետտին կղեկավարի երկրի էկոնոմիկայի նախարարությունը։
