«Լսել էին, որ ճանապարհ ենք փակելու, հանկարծ որոշեցին հորս մարզպետարան կանչել». անհետ կորածի եղբայր

 Ինչի ենք մենք ճանապարհ փակել, հիմա զինկոմիսարիատի անձնակազմը պետք է այստեղ լիներ, ոչ թե ոստիկանները: Այս մասին, այսօր՝ հոկտեմբերի 12-ին, Արմավիրի մարզի Լուսագյուղ գյուղ մտնող ճանապարհին բողոքի ակցիայի ժամանակ նշեց անհետ կորած ժամկետային զինծառայող Վահե Թորոսյանի եղբայրը:

«Լսել էին, որ այսօր ճանապարհ ենք փակելու, հորս մարզպետարան են կանչել: Հիմա հարց՝ ինչի՞ համար հենց այսօր են կանչել, ուր էին մինչեւ էսօր, այս մեկ ամսում չկային: Ինձ իրենք ընդհանրապես չեն հետաքրքրքում, ինձ իմ ախպերն ա հետաքրքրում: Ինչքա՞ն սպասենք»,-ասաց նա:

Վահե Թորոսյանի պապն էլ նշեց. «Մեկ ամիս է արդեն, ոչ մի պատասխան չունենք: Ոչ մի բան չեն անում: Հստակ կոորդինատներով գիտեն՝ մեր երեխեն որտեղ է, ինչու չեն գնում բերեն: մենք ունենք հետախույզներ, ունենք բանակ, ո՞ւր են չկան: Ճիշտն էն կլինի, որ ոչ մեկը չգնա ծառայության»:

Անհետ կորած զինծառայողի հարազատները հայտարարեցին, որ մինչեւ գիշեր փակ են պահելու ճանապարհը. «Մինչեւ էս հարցին լուծում չտան, մենք ճանապարհ չենք բացելու»:

Ավելի վաղ հայտնել էինք, որ սեպտեմբերի 14-ից անհետ կորած ժամկետային զինծառայող Վահե Թորոսյանի հարազատները փակել են Արմավիրի մարզի Լուսագյուղ գյուղ մտնող ճանապարհը:

Նրանք դեռ հոկտեմբերի 10-ին բողոքի ակցիա էին կազմակերպել ՊՆ շենքի մոտ: Հարազատները նշում են, որ Վահե Թորոսյանը վերջին անգամ կապ է հաստատել սեպտեմբերի 14-ին, նա հստակ նկարագրել է, թե որտեղ է գտնվում, բայց ՀՀ իշխանությունները ոչինչ չեն անում իրենց տղային այտեղից հանելու համար, ասում են, որ այդ տարածքը Ադրբեջանի վերահսկողության տակ է:

«Սեպտեմբերի 16-ից ադրբեջանական կողմը թույլ չի տալիս մտնել իրենց կողմից վերահսկվող տարածք՝ Սյունիքի Հանդ գյուղի վերեւի հատված: Երեխեն զանգել է սեպտեմբերի 15-ին, իր ընկերոջը բացատրել է, թե որ ձորակում է: Բայց մերոնք ոչ մի քայլ չեն ձեռնարկում: Մենակ աշխատում է զորամասի հրամանատարական կազմը: Մեր մարդիկ ուզում են մտնել տարածք, բայց Ադրբեջանը թույլ չի տալիս»,-ասել էր հարազատներից մեկը: