Իլոն Մասկը հայտնել է, թե երբ և ինչ է խոսել Վլադիմիր Պուտինի հետ
Ամերիկացի միլիարդատեր Իլոն Մասկը հերքում է տեղեկությունը, թե իբր շփվել է ՌԴ նախագահ Վլադիմիր Պուտինի հետ «Ուկրաինայի համար խաղաղության ծրագրի» մասին թվիթ անելուց առաջ։
«Ոչ, ես Պուտինի հետ միայն մեկ անգամ եմ խոսել, և դա եղել է մոտ 18 ամիս առաջ, թեման տիեզերքն էր»,- գրել է Մասկը։
Ավելի վաղ Vice ամերիկյան խոշոր հրատարակությունը, վկայակոչելով Eurasia Group խորհրդատվական ընկերության գործադիր տնօրեն Յան Բրեմերին, գրել էր, որ Իլոն Մասկը խոսել է Պուտինի հետ Ուկրաինայում խաղաղության հասնելու ծրագրի հրապարակումից առաջ։
Ըստ Բրեմերի՝ Մասկը իրեն ասել է, որ Պուտինը «պատրաստ է բանակցել», բայց միայն այն դեպքում, եթե Ղրիմը մնա ռուսական, իսկ Ուկրաինան չեզոք լինի և ճանաչի ԼԺՀ-ի, ԴԺՀ-ի, Խերսոնի և Զապորոժիեի շրջանների անցումը Ռուսաստանին:
«Սա բավականին լուրջ մեղադրանք է։ Ի վերջո, Մասկին այժմ կարող են դատի տալ Լոգանի օրենքը խախտելու համար, որն արգելում է ԱՄՆ քաղաքացիներին մասնավոր կերպով զբաղվել դիվանագիտությամբ՝ շրջանցելով ամերիկյան պետությունը։ Էլ չեմ խոսում Մասկին որպես «ռուսամետ միլիարդատեր» ներկայացնելու բոլոր փորձերի մասին՝ ամերիկյան հասարակության մեջ նրա հեղինակությունը ինչ-որ կերպ վնասելու համար»,- Взгляд-ին ասել է ամերիկագետ Մալեկ Դուդակովը։
