Չավուշօղլուն՝ Հայաստանի հետ հարաբերությունների, Զանգեզուրի միջանցքի մասին
Թուրքիայի արտգործնախարար Մևլութ Չավուշօղլուն Haber Global-ին տված հարցազրույցում նշել է, որ Թուրքիայի և Հայաստանի ներկայացուցիչներն արդեն 4 հանդիպում են անցկացրել։ Նա ասել է, որ հիմնական նպատակը հարաբերություններ կառուցելն է։
«Ադրբեջանի հաղթանակից հետո մենք աջակցում ենք Հարավային Կովկասում խաղաղություն հաստատելու փորձերին։Հանդիպումներ են տեղի ունենում, քայլեր են արվում՝ ուղիղ չվերթների, օդային տարածքի բացման հարցերով», - նշել է նա։
Ըստ թուրք նախարարի՝ Հարավային Կովկասում խաղաղություն կարելի է ձեռք բերել Ադրբեջանի և Հայաստանի միջև խաղաղության պայմանագրի ստորագրմամբ։
«Ադրբեջանը մի շարք առաջարկներ արեց, Հայաստանը երկար ժամանակ չէր արձագանքում այդ առաջարկներին։ Կայացել են մի շարք հանդիպումներ, ստեղծվել է սահմանային հանձնաժողով։ Կա նաեւ Զանգեզուրի միջանցքը, որի հիշատակումը նյարդայնացնում է Հայաստանին։ Բայց սա այն եռակողմ պայմանագրերում է, որ ստորագրել է Հայաստանը»,- ասել է նա։
