Պուտինն ու Լուկաշենկոն կքննարկեն արևմտյան պատժամիջոցներին հակազդելու միջոցները
Բելառուսի նախագահ Ալեքսանդր Լուկաշենկոն իր ռուս գործընկեր Վլադիմիր Պուտինի հետ ապրիլի 12-ին կքննարկի երկու երկրների համատեղ միջոցառումները՝ Արևմուտքի պատժամիջոցներին հակազդելու համար։ Այս մասին հայտնում է Բելառուսի պետության ղեկավարի մամուլի ծառայությունը, փոխանցում է Ռիա Նովոստին։
«Ապրիլի 12-ին նախատեսված է հանդիպում և բանակցություններ ՌԴ նախագահ Վլադիմիր Պուտինի հետ: Տիեզերագնացության օրը երկու երկրների ղեկավարները համատեղ կայցելեն Ամուրի մարզում գտնվող «Վոստոչնի» տիեզերակայան, որի ենթակառուցվածքի կառուցումը նախատեսվում է նաև բելառուս մասնագետների մասնակցությամբ:
Պետությունների ղեկավարները կծանոթանան տիեզերական համալիրի կառուցմանը, կշփվեն օդաչու-տիեզերագնացների և տիեզերակայանի աշխատակիցների հետ»,- ասված է մամուլի ծառայության հաղորդագրության մեջ։
Մամուլի ծառայությունից ընդգծել են, որ Լուկաշենկոն և Պուտինը կքննարկեն բելառուս-ռուսական հարաբերությունների հարցերի ողջ շրջանակը։
Բանակցություններից հետո պետությունների ղեկավարները կհանդիպեն բելառուսական և ռուսական լրատվամիջոցների ներկայացուցիչների հետ։
