ՏԵՍԱՆՅՈՒԹ. Դռները փակում են հնդիկ ուսանողների «դեմքին» և չեն տալիս նրանց դիպլոմը. սկանդալ Սուրբ Թերեզայի անվան բժշկական համալսարանում

«Էս մարդիկ արդեն 20 օր է առավոտը 5-ից մինչև ուշ գիշեր համալսարանի դիմաց սպասում են իրենց փաստաթղթերին: Համալսարանը զրկվել է լիցենզիայից, ավարտելուց 2 ամիս առաջ հայտնվել են անորոշ իրավիճակում, ստիպված են այլ բուհ տեղափխվել, էն էլ 1-2 կուրս ցածր նստել, էլի գումար տալ, որ վերջապես դիպլոմ ստանան, իսկ իրենց համալսարանը չի տալիս փաստաթղթերը, այսօր էլ այլ բուհ դիմելու վերջին օրն էր: 

Ոստիկանություն են դիմել, ասել են` սպասեք մինչև երկուշաբթի: 

Իսկ էն, ինչ կատարվում է համալսարանի դիմաց, նկարագրելու չի, ուղղակի հեռու է քաղաքակրթությունից»: 

Ֆեյսբուքում գրել է լրագրող Անժելա Պողոսյանը եւ տեսանյութ հրապարակել: Նա նաեւ հրավիրում է ՀՀ կրթության, գիտության, մշակույթի և սպորտի նախարարություն եւ ՀՀ ոստիկանության ուշադրությունը:

Հիշեցնենք, որ Սուրբ Թերեզայի անվան բժշկական համալսարանի շուրջ կոռուպցիոն սկանդալից ու համալսարանի լիցենզիան դադարեցնելուց հետո շուրջ 120 հնդիկ ուսանողներ կանգնել են խնդրի առաջ․ ուսանողներին առաջարկվում է կրթությունը շարունակել այլ բուհերում, բայց անհրաժեշտ փաստաթղթերը համալսարանից չեն կարողանում ստանալ։

Բուհի բակալավրի և մագիստրոսի ծրագրով լիցենզիաների գործողությունը դադարեցվել էր ԿԳՄՍ նախարարի փետրվարի 18-ի հրամանով։ Պատճառը հայտնաբերված մի շարք խախտումներն են՝ պրոֆեսորադասախոսական կազմի, ուսումնական տարածքի, ուսումնամեթոդական ապահովության, ուսումնական պրակտիկայի ներկայացված պահանջներին անհամապատասխանությունը, ինչպես նաև սահմանված թվից ավելի ուսանողների ընդունումը։