Առեղծվածային բանալիները դեռևս Դատական դեպարտամենտ չեն հասել. համակարգում խափանում կա

Դատարաններում գործերի բաշխման էլեկտրոնային համակարգի առեղծվածային բանալիները դեռևս Դատական դեպարտամենտ չեն հասել։ ԲԴԽ մամուլի և հասարակայնության հետ կապերի ծառայությունից հայտնում են, որ էլեկտրոնային մակագրման համակարգի գործարկման և շահագործման բանալիները Դատական դեպարտամենտ 21.03.2022 թվականի ժամը 18:00-ի դրությամբ դեռևս չեն վերադարձվել: 

«Հայաստանի Հանրապետության Բարձրագույն դատական խորհրդի հանձնարարությամբ՝ Դատական դեպարտամենտն ամենօրյա ռեժիմով աշխատանքներ է իրականացնում համակարգի վերագործարկման նպատակով: 
Գործընթացի վերաբերյալ թե՛ Դատական դեպարտամենտը, թե՛ Բարձրագույն դատական խորհուրդն ավելի մանրամասն տեղեկություն այս պահի դրությամբ տրամադրել չեն կարող:  Հավաստիացնում ենք, որ մեր լիազորությունների շրջանակում ձեռնարկում ենք բոլոր հնարավոր քայլերը՝ դատական գործերի մակագրումներն էլեկտրոնային համակարգով իրականացնելու հնարավորությունն օր առաջ վերսկսելու համար»,- նշված է ԲԴԽ մամուլի և հասարակայնության հետ կապերի ծառայության տարածած հաղորդագրությունում։ 

Հիշեցնենք, որ մարտի 17-ին ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանը ֆեյսբուքյան իր էջում հայտնել է, որ ՀՀ դատախազությունն անհրաժեշտ միջոցներ է ձեռնարկել քննությանն անհրաժեշտ տվյալները հնարավորինս սեղմ ժամկետում ստանալու և համակարգի գործարկման խոչընդոտները բացառելու ուղղությամբ։ 

«Մասնավորապես, քրեական գործով նշանակված փորձաքննությունը կատարող փորձագետի կողմից արդեն իսկ ուսումնասիրվել են հետազոտման ենթակա օբյեկտները, և համակարգի վերագործարկումն ու շահագործումը չի կարող բացասաբար անդրադառնալ փորձաքննության օբյեկտիվության և լիարժեքության վրա։ Հետևաբար քրեական գործով առգրավված՝ համակարգի գործարկման և շահագործման առգրավված բանալիները վերադարձվել են, և ՀՀ դատական դեպարտամենտի ղեկավարին հայտնվել է, որ մակագրման համակարգը կարող է վերագործարկվել»,- ֆեյսբուքյան իր էջում գրել է Աբրահամյանը։ 

Դատախազի խորհրդականի գրառմանն արձագանքել է Դատական դեպարտամենտը՝ պնդելով, թե առգրավված բանալիները չեն վերադարձվել, իսկ Դեպարտամենտի կողմից հերքում տարածելուց հետո Աբրահամյանը ֆեյսբուքյան իր էջում հրապարակել է փաստաթուղթը՝ վերահաստատելով իր կողմից պնդումը, որ բանալիները վերադարձվել են դեպարտամենտին։