ՌԴ Կենտրոնական բանկը կսկսի վերահսկել քաղաքացիների միջև դրամական բոլոր փոխանցումները. РБК

ՌԴ Կենտրոնական բանկը կսկսի բանկերից տվյալներ պահանջել ֆիզիկական անձանց միջև դրամական բոլոր փոխանցումների վերաբերյալ։ Այս մասին հայտնում է РБК-ն՝ հղում անելով վճարային շուկայի 3 աղբյուրի:

Ռուսաստանի Բանկը վարկային կազմակերպություններին ուղարկել է ֆիզիկական անձանց միջև դրամական փոխանցումների վերաբերյալ հաշվետվությունների նոր ձև: Դրանից բխում է, որ Կենտրոնական բանկը տեղեկատվություն կպահանջի բոլոր p2p գործարքների մասին, ներառյալ՝ ուղարկողների և միջոցներ ստացողների անձնական տվյալները: Հաշվետվության նոր ձևի ստացման մասին տեղեկատվությունը հաստատել է QIWI վճարային ընկերության ներկայացուցիչը:
 

Ըստ «Совкомбанк»-ի վարչության նախագահի տեղակալ Օլեգ Մաշտալյարի՝  Ռուսաստանի Բանկը 2022 թվականի հունվարից կսկսի p2p փոխանցումների ռիսկի վրա հիմնված մոնիտորինգը: 

«Կենտրոնական բանկը ծանուցել է, որ նախատեսում է 2022 թվականից պարբերաբար պահանջել տեղեկատվություն p2p փոխանցումների վերաբերյալ տվյալ տեսքով», - ավելացրել է QIWI-ի ներկայացուցիչը։

Ինչպես լրատվամիջոցին հայտնել են ՌԴ Կենտրոնական բանկից՝ հաշվետվությունների նոր ձևերի ներդրման հիմնական նպատակը բանկերի կողմից տվյալների ներկայացման օպտիմալացումն է և վճարային ծառայությունների վերաբերյալ արդի տեղեկատվություն ստանալը: