Վրաստանի ընդդիմությունն իշխանություններին 24 ժամ է տվել

Ընդդիմությունը Վրաստանի իշխանություններին 24 ժամ է տվել 37 օր առաջ հացադուլ հայտարարած Վրաստանի նախկին նախագահ Միխեիլ Սաակաշվիլիին քաղաքացիական կլինիկա տեղափոխելու համար, ինչի մասին Ռուսթավի բանտի մոտ բողոքի ակցիայի ժամանակ հայտարարել է գլխավոր ընդդիմադիր «Միացյալ ազգային շարժում» կուսակցության ղեկավար Նիկա Մելիան, գրում է sputnik-georgia.ru-ն: 

«Մենք իշխանություններին 24 ժամ ենք տալիս Միխեիլ Սաակաշվիլիին քաղաքային կլինիկա տեղափոխելու համար, որտեղ պաշտպանված կլինեն նրա կյանքն ու առողջությունը։ Եթե այս պայմանը չկատարվի, ապա ժամը 20:00-ին ամբողջ Վրաստանով կհավաքվենք Ազատության հրապարակում»,-հայտարարել է Մելիան։ 

Մնացած պահանջները և գործողությունների ծրագիրը կհրապարակվեն մայրաքաղաքի Ազատության հրապարակում, հավելել է նա։ 

Սաակաշվիլին ձերբակալվել է Վրաստանում հոկտեմբերի 1-ին: Միաժամանակ, Վրաստանի օմբուդսմեն Նինո Լոմջարիան հայտարարել էր, որ ձերբակալությունից հետո նա հացադուլ էր սկսել, քանի որ համաձայն չէ առաջադրված մեղադրանքների հետ և իրեն համարում է քաղբանտարկյալ: Վրաստանում Սաակաշվիլին ներգրավված է մի քանի քրեական գործերում: Նախկին նախագահը հեռակա դատապարտվել է բանկիր Սանդրո Գիրգվլիանիի սպանության և պատգամավոր Վալերի Գելաշվիլիի ծեծի համար: Առաջին դեպքում նա դատապարտվել է երեք տարվա ազատազրկման, երկրորդում՝ վեցի: Բացի այդ, Սաակաշվիլին ներգրավված է 2007 թվականի նոյեմբերի 7-ին ընդդիմության հանրահավաքը ցրելու, «Իմեդի» հեռուստաընկերության ջարդի և պետական բյուջեից միջոցների յուրացման գործերում: Դրանք դեռ դատարանում են: