Չե՞ք նկատել, որ այլեւս Բաքվից չեն հնչում հայտարարություններ դեմարկիացիայի եւ դելիմիտացիայի մասին. Փաշինյան
Ի սկզբանե նաեւ դահլիճում ներկա որոշ ուժերի միջոցով փորձ էր արվում տպավորություն ստեղծել, թե դեմարկացիան ու դելիմիտացիան Հայաստանին պարտադրվող օրակարգ է. մենք հետեւողական, հստակ ասացինք, որ մենք գնում ենք այդ օրակարգին եւ մենք ենք շահագրգռված այդ օրակարգով։ Այս մասին այսօր՝ օգոստոսի 26-ին, ԱԺ-ում հայտարարեց վարչապետ Նիկոլ Փաշինյանը։
«Չե՞ք նկատել, որ այլեւս Բաքվից չեն հնչում հայտարարություններ դեմարկիացիայի եւ դելիմիտացիայի մասին։ Ընդհակառակը փորձ է արվում այդ օրակարգից դուրս բերել այդ հարցը։ Մեր վրա դրված է պատմական պատասխանատվություն։ Մեր երկրի առաջ կանգնած մարտահրավերներն այսօր ավելին են, քան կարելի է այս ամբիոնից ասել։ Ասում են՝ բանակցային գործընթացը ձախողել եք, ես չեմ հոգնելու, Սերժ Սարգսյանը 2018 թվականի ապրիլի 17-ին այս ամբիոնից ասել է՝ բանակցային գործընթացը լավատեսություն չի ներշնչում, ավելի հստակ կարելի է ասել, որ այդ բանակցային գործընթացը ուղղակի կանգնած է, կանգնած է, որովհետեւ բանակցությունների արդյունքից Ադրբեջանի ղեկավարության ակնկալիքները անիրատեսական ու անընդունելի են մեզ համար։ Էս մարդիկ մեզ ասում են՝ դուք բանակցային գործընթաց եք ձախողել։ Դե եկեք, պատասխան տվեք, թե ոնց եք բանակցային գործընթացը տարել, որ հնարավորություն եք տվել Ադրբեջանին՝ գալ, սեղանի շուրջ նստել, ձեռքը խփել սեղանին եւ անընդունելի, անիրատեսական պահանջ ձեւակերպել»,- ասաց Նիկոլ Փաշինյանը։
