Հայաստանում մեծ վստահությամբ են վերաբերվում «Սպուտնիկ V» պատվաստանյութին. Նիկոլ Փաշինյան

Կորոնավիրուսի դեմ «Սպուտնիկ V» ռուսական պատվաստանյութը Հայաստանում մեծ վստահություն է վայելում, եւ Երեւանը այդ դեղամիջոցի մոտ մեկ միլիոն չափաբաժին մատակարարելու կարիք ունի: Այս մասին Պավել Զարուբինին տված հարցազրույցում՝ «Մոսկվա. Կրեմլ. Պուտին» հաղորդման ժամանակ «Ռոսիա-1» հեռուստաալիքով հայտարարել է ՀՀ վարչապետ Նիկոլ Փաշինյանը: 

«Առաջին խմբաքանակը Հայաստան է գալիս, դա 15 հազար դեղաչափ է, բայց մենք միլիոնների կարիք ունենք։ Եվ մենք Ռուսաստանի նախագահի հետ պայմանավորվել ենք, որ Հայաստանը կստանա։ Այսօր աշխարհում ռուսական պատվաստանյութի հեղինակությունը, հատկապես «Սպուտնիկ V»-ն, շատ է բարձրանում։ Եվ Հայաստանում նույնպես մեծ վստահությամբ են վերաբերվում այդ պատվաստանյութին», - նշել է նա։ 

Փաշինյանը նաեւ հավելել է, որ շատ գոհ է ապրիլի 7-ին Մոսկվայում ՌԴ նախագահ Վլադիմիր Պուտինի հետ կայացած բանակցություններից: «Մենք շատ հագեցած օրակարգ ունեցանք։ Արդյունավետ քննարկել ենք երկկողմ հարաբերությունների բոլոր հարցերը, տարածաշրջանային հարցերը, անվտանգության հարցերը, Լեռնային Ղարաբաղի իրավիճակի հետ կապված շատ հարցեր: Ես շատ գոհ եմ», - ընդգծել է նա։ 

Կորոնավիրուսի «Սպուտնիկ V» ռուսական պատվաստանյութի առաջին խմբաքանակը հինգշաբթի առավոտյան տեղափոխվել է Հայաստան։ Հանրապետության առողջապահության նախարար Անահիտ Ավանեսյանը լրագրողներին տեղեկացրել է, որ մատակարարված խմբաքանակի համար հայկական կողմը վճարել է 142 500 դոլար: