Հայտնի է` ինչ են պայմանավորվել Հայաստանի, Ադրբեջանի ու ՌԴ–ի փոխվարչապետները Մոսկվայում
Մոսկվայում ավարտվել է Հայաստանի, Ադրբեջանի և Ռուսաստանի փոխվարչապետների առաջին հանդիպումը: Տասս գործակալության տեղեկությւոններով Լեռնային Ղարաբաղի հարցով եռակողմ աշխատանքային խմբի անդամները որոշում են ընդունել փորձագիտական ենթախմբեր ստեղծել:
Ռուսաստանի փոխվարչապետ Ալեքսեյ Օվերչուկը գործակալությանը հայտնել է, որ դրանք կզբաղվեն տրանսպորտային փոխադրումների իրականացման, դրանց անվտանգության ապահովման, ինչպես նաև այլ բնույթի վերահսկողության հարցերով:
Հաղորդագրության համաձայն՝ կողմերը նախատեսում են ստեղծել հետևյալ փորձագիտական ենթախմբերը․
– երկաթուղային, ավտոմոբիլային և համակցված փոխադրումների գծով,
– փոխադրումների ապահովման հարցերով ՝ ներառյալ անվտանգությունը, սահմանային, մաքսային, սանիտարական, անասնաբուժական, բուսասանիտարական և հսկողության այլ տեսակները:
Ենթախմբերի ձևավորումը պետք է իրականացվի մինչև փետրվարի 2-ը:
Հիշեցնենք, որ փոխվարչապետ Մհեր Գրիգորյանի մասնակցությամբ եռակողմ աշխատանքային խումբը ստեղծելու համաձայնություն էր ձեռք բերվել հունվարի 11-ին՝ Մոսկվայում երեք երկրների ղեկավարների եռակողմ հանդիպման ընթացքում:
