Քաջարանում սկսվեցին սահմանազատման աշխատանքները

Սյունիքի մարզի Քաջարան քաղաքում արդեն սկսվեցին սահմանազատման աշխատանքները՝ GPS համակարգով։ Այս մասին NEWS.am-ը տեղեկացավ Քաջարանի քաղաքապետ Մանվել Փարամազյանից:

Նա ասաց, որ այս պահին ուսումնասիրվում է քարտեզը՝ հստակ սահմանազատման համար։

Նշենք, որ ՀՀ պաշտպանության նախարարության որոշմամբ, այսօր՝ մինչեւ ժամը 17։00-ն Սյունիքի կարեւոր դիրքերը հանձնվում են հակառակորդին։

Մեզ հետ զրույցում Կապանի քաղաքապետ Գեւորգ Փարսյանն ասել էր, որ դիրքերից հետնահանջի դեպքում Կապանի գյուղեր տանող 2 ուղղություններն արգելափակման մեջ են հայտնվում. «Այսինքն՝ այդ գյուղերի ճանապարհներն ադրբեջանական սահմանագոտու մեջ են լինելու։ Ագարակ, Եղվարդ, Խդրանց, Ուժանիս, իսկ մյուս ուղղությունն էլ՝ Ճակատեն, Շիկահող, Սրաշեն, Ներքին Հանդ, Ծավ, Շիշկերտ. այդքան գյուղ շրջափակման մեջ է հայտնվում։ Այն պարագայում, որ Ագարակ, Ուժանիս, Խդրանց, Եղվարդ գյուղերն ունեն այլընտրանքային ճանապարհ, բայց Ճակատեն, Շիկահող, Սրաշեն, Ներքին Հանդ, Ծավ, Շիշկերտ գյուղերն այլընտրանքային ճանապարհ չունեն»։

Ավելի ուշ, ՊՆ-ից հայտնել էին, որ նախարար Վաղարշակ Հարությունյանը հանդիպել է Սյունիքի մարզի մի շարք համայնքների ղեկավարների հետ եւ  ասել, որ սահմանը ճշգրտվում է երկու կողմերի բարձրաստիճան սպաների ներկայությամբ, եւ որ ՀՀ տարածքից որեւէ մետր չի զիջվելու։