Ավստրալացի պատգամավորը շնորհավորել է արցախցիներին և հայտնվել Ադրբեջանի «սև ցուցակում»
Ավստրալիայի Նոր Հարավային Ուելսի խորհրդարանի պատգամավոր Հյու ՄաքԴերմոթը Արցախի ժողովրդին նախագահական ընտրությունների հետ կապված շնորհավորելուց հետո հայտնվել է Ադրբեջանի, այսպես կոչված, «սեւ ցուցակում»:
«Շնորհավորում եմ Արցախի հայկական հանրապետության բնակիչներին, որոնք այս շաբաթ անցկացրին իրենց նախագահական ընտրությունները: Քվեարկել և իր ժողովրդավարական իրավունքներից է օգտվել ընտրողների 72 տոկոսից ավելին: Թեկնածուներին հաջողություն եմ մաղթում ապրիլի 14-ի երկրորդ փուլում»,- իր թվիթերյան էջում գրել է ՄաքԴերմոթը:
«Ավտորիտար ռեժիմների և բռնապետությունների տարածաշրջանում հիանալի է տեսնել փթթող ժողովրդավարություն: Շնորհավորում ենք Արցախի ազատ ժողովրդին»,- գրել է նա՝ ավելի ուշ անձամբ տեղեկացնելով, որ հայտնվել է «սև ցուցակում»։
«Ինչպիսի պատիվ»․ այսպես է նա արձագանքել Ադրբեջանի քայլին՝ հրապարակելով ամբողջական ցուցակի հղումը։
