Երևանի ընդհանուր իրավասության դատարանի Ավան և Նոր-Նորք նստավայրում դատարանի ծանրաբեռնվածության պատճառով այսօր հետաձգվեց ՀՀ նախկին փոխոստիկանապետ Լևոն Երանոսյանի գործով դատական նիստը։ Նիստից հետո Լևոն Երանոսյանը հրաժարվեց պատասխանել լրագրողների հարցերին` նշելով, որ իր խոստացածի համաձայն` կխոսի ավելի ուշ, գործի ընթացքում։

 Ի պատասխան լրագրողների հարցին, թե այս պահին հայտարարություն չունի՞` պայմանավորված ոստիկանապետի փոփոխությամբ, Երանոսյանը նշեց. «Դուք մի մոռացեք, որ ես զինվորական եմ, ոչ ոստիկան»։ Լրագրողների մյուս հարցին, թե ընդունո՞ւմ է մեղադրանքը, Երանոսյանն ասաց. «Ոչ, ես մեղք չեմ գործել»։

Հիշեցնենք, որ այսօր դատարանում ընթանում էր ապացույցների հետազոտման փուլը, որին ներկա էին գործով տուժող ճանաչված անձինք, այդ թվում`ԱԺ փոխնախագահ Ալեն Սիմոնյանը։ Հաջորդ դատական նիստը նշանակվեց նոյեմբերի 22-ին`ժ. 12:30-ին։ Համաձայն մեղադրական եզրակացության՝ Լևոն Երանոսյանը հատուկ միջոցների գործադրմամբ դիտավորությամբ կատարել է այնպիսի գործողություններ, որոնք ակնհայտորեն դուրս են եկել իր լիազորությունների շրջանակից և էական վնաս են պատճառել քաղաքացիների իրավունքներին ու օրինական շահերին, ինչպես նաև անզգուշությամբ առաջացրել են ծանր հետևանքներ։ Նրան մեղադրանք է առաջադրվել ՀՀ ՔՕ-ի 309 հոդվածի 1-ին մասի 2-րդ եւ 3-րդ կետերով։ Երանոսյանի նկատմամբ որպես խափանման միջոց է ընտրված ստորագրությունը չհեռանալու մասին։