Եվրասիական տնտեսական բարձրագույն խորհրդի նիստին մասնակցելու նպատակով Հայաստան ժամանած բոլոր բարձրաստիճան պաշտոնյաներն արդեն մեկնել են Հայաստանից: «Հայկական ժամանակ»-ի հարցմանն ի պատասխան այդ մասին տեղեկացրել է արտգործնախարարության մամուլի խոսնակ Աննա Նաղդալյանը:

Լրատվականին հաջողվել է  ճշտել, որ նախագահներից ոմանք գիշերել են «Գոլդեն Փելես Երեւան», «Ալեքսանդր», «Ռեդիսոն Բլյու» հյուրանոցներում:

«Ալեքսանդր» հյուրանոցում, մասնավորապես, գիշերել է Ղազախստանի նախագահ Տոկաեւը: Նրան տրամադրվել է հյուրանոցի «Ալեքսանդր սյութ» համարը: Այս համարից նշված հյուրանոցում մեկ հատ է. այն նախագահական է եւ 1 գիշերն արժե 1 միլիոն 800 հազար դրամ:

«Ռեդիսոն Բլյու» հյուրանոցում հրաժարվել են հայտնել, թե որ երկրի առաջնորդն է այնտեղ գիշերել, սակայն նշել են, որ երեկ նախագահական համարն արժեցել է 1 միլիոն 686 հազար դրամ: 

Ինչ վերաբերում է «Գոլդեն Փելիս Երեւան» հյուրանոցին՝ այնտեղ կա ընդամենը մեկ նախագահական համար, որն արժե 1 միլիոն 500 հազար դրամ: Նշենք, որ այստեղից էլ են հրաժարվել հայտնել, թե որ երկրի նախագահն է գիշերել այնտեղ։