Հիմա շատ լավ կառավարում եմ. Մասիսի քաղաքապետ

Այսօր` հուլիսի 9-ին Երեւան քաղաքի ընդհանուր իրավասության դատարանի Շենգավիթի նստավայրում դատավոր Ռոբերտ Պապոյանի նախագահությամբ դեռ չսկսված հետաձգվեց Մասիսի քաղաքապետի եւ մյուսների գործով դատական նիստը: 

Մասիսի քաղաքապետ Դավիթ Համբարձումյանը լրագրողների հետ զրույցում ևս մեկ անգամ պնդեց, որ չի ընդունում իրեն առաջադրված մեղադանքը. «Ժամանակը թող գա, դատավարությունը կավարտվի, բոլորդ կիմանաք, թե ինչ է եղել, այն ժամանակ խոստացել եմ, մամուլի ասուլիս կհրավիրեմ եւ բոլոր հարցերին կպատասխանեմ»: 

Լրագրողի հարցին`  նեղացա՞ծ է իշխանություններից,  պատասխանեց. «Իհարկե ոչ, ես երբեք ոչ ոքից չեմ նեղանում, կարծում եմ թույլ մարդու բնավորություն է նեղանալը»։

Դիտարկմանը, հե՞շտ է ամբաստանյալի կարգավիճակում քաղաքը ղեկավարելը, Դավիթ Համբարձումյանը պատասխանեց. «Շատ լավ է, ընդհակառակը հիմա շատ լավ կառավարում եմ։ Կարող եք մասիսցիներին հարցնել, մասիսցիների հետ շփվում եմ, իրենք այդ մասին կփաստեն»։