50 հոգով կարող ենք շատ լավ աշխատել. Սփյուռքի գործերի հանձնակատար
Սոցիալական ցանցերում այնքան բաներ են խոսում, ես չգիտեմ, թե ինչի մասին է խոսքը: Այս մասին լրագրողների հետ զրույցում ասաց ՀՀ սփյուռքի գործերի գլխավոր հանձնակատար Զարեհ Սինանյանը՝ պատասխանելով հարցին, թե ճիշտ են հրապարակումները, որ իր նշանակումը սփյուռքում միանշանակ չի ընդունվել:
Դիտարկմանը, թե տեղեկություններ են եղել, թե ինքը «Դաշնակցության» շահերն է առաջ տարել ԱՄՆ-ում, երբ այնտեղ պաշտոնական այցով է եղել Սփյուռքի նախկին նախարար Մխիթար Հայրապետյանը, Սինանյանն արձագանքեց, որ 13 տարի հասարակական գործունեությամբ է զբաղվել, քաղաքական գործիչ է, կարող են լինել անձինք, ովքեր իրեն չսիրեն, և դա նորմալ է համարում: «Մարդիկ կարծիքների իրավունք ունեն: Ես եղել եմ Գլենդելի քաղաքապետ և ներկայացրել եմ այնտեղի քաղաքացիների շահերը: Իսկ ինչ ասում եք Մխիթար Հայրապետյանի մասին, դա նրա հետ պարզեք, ես չեմ հիշում այդպիսի բան»,-ասաց նա:
Վերջինս նշեց նաև, որ գաղտնիք չէ, որ իր նշանակումից առաջ էլ վարչապետ Փաշինյանի հետ լավ հարաբերություններ է ունեցել:
Ինչ վերաբերում է հանձնակատարի գրասենյակին, Սինանյանն ասաց, որ իր տեսլականը 50 հոգի ունենալն է, բայց գրասենյակն ամբողջովին դեռևս չի ձևավորվել: «Գտնում եմ, որ 50 հոգով կարող ենք շատ լավ աշխատել: Մենք բյուջե չունենք, վարչապետի գրասենյակի բյուջեի մի մասն ենք կազմում: Գլխավոր խնդիրը Սփյուռքի հետ հարաբերությունների ամրապնդումն է, այս պահին վերականգնում ենք վստահությունը Հայաստանի նկատմամբ, որ առաջացել էր նախորդ իշխանությունների վարած քաղաքականության արդյունքում»,-հայտարարեց նա:
Հարցին, թե ինչու թողեց ԱՄՆ-ն և եկավ ՀՀ, ինչը գրավեց, նա արձագանքեց՝ հայրենիքը և հայրենիքի զարգացման մեջ գործ ունենալու ցանկությունը: «Հաստատ գիտեմ, որ կարող եմ լավ աշխատել և աշխատանքով պետք է ցույց տամ՝ լավ ընտրություն է եղել, թե ոչ»,-եզրափակեց Սինանյանը:
