Զանգվածային հարձակում Վոլգոգրադի վրա․ այրվում է Wildberries-ի պահեստը

Վոլգոգրադում Wildberries-ի լոգիստիկ օբյեկտի վրա իրականացված հարձակման հետևանքով հրդեհ է բռնկվել։ Այդ մասին հայտնել են ընկերության մամուլի ծառայությունից «Տելեգրամ»-ում։

Դեպքի վայրում աշխատում են հրշեջ հաշվարկները։ Նախնական տեղեկություններով՝ տուժածներ չկան։

«Լոգիստիկ շղթաները վերակազմակերպվել են, մատակարարումների ընդունումն ու պատվերների առաքումն իրականացվում են այլ օբյեկտներում», - հավելել են Wildberries-ի ներկայացուցիչները։

Ավելի վաղ Վոլգոգրադի մարզի նահանգապետ Անդրեյ Բոչարովը հայտնել էր, որ Ուկրաինայի զինված ուժերի անօդաչու թռչող սարքերը զանգվածային հարձակում են իրականացրել տարածաշրջանի վրա։

Վոլգոգրադի հարավում հրդեհներ են արձանագրվել վառելիքաէներգետիկ համալիրի արդյունաբերական ձեռնարկությունում, ինչպես նաև Ձերժինսկի շրջանում գտնվող պահեստային տարածքներում։

Վնասվել են նաև բազմաբնակարան և առանձնատներ։ Տուժել է հինգ մարդ, որոնց ցուցաբերվում է անհրաժեշտ օգնություն։