2020 թվականին ստացել է ԱՄՆ 220 մլն ընտրողների տվյալների հասանելիություն. Թրամփի մեղադրանքները Չինաստանին

ԱՄՆ նախագահ Դոնալդ Թրամփն ուղերձով հայտնել է երկրի ընտրական համակարգում առկա «ցնցող խոցելիությունների» և գաղտնազերծված տվյալների մասին, որոնց համաձայն՝ Չինաստանը հասանելիություն է ստացել 220 միլիոն ամերիկացի ընտրողների տվյալներին։

ԱՄՆ նախագահ Դոնալդ Թրամփը ազգին ուղղված 25-րոպեանոց ուղերձում հայտարարել է երկրի ընտրական համակարգի «ցնցող խոցելիությունների» մասին և հայտնել հետախուզական տվյալների գաղտնազերծման մասին, որոնք, մասնավորապես, նշում են, որ Չինաստանը հասանելիություն է ստացել 220 միլիոն ամերիկացի ընտրողների տվյալներին։ Թրամփի ուղիղ եթերով ելույթը տեղի է ունեցել ուրբաթ գիշերը՝ հուլիսի 17-ին։ Տեսագրությունը հրապարակվել է Սպիտակ տան Յութուբյան ալիքում։

«Մի քանի տարվա ընթացքում՝ սկսած 2020 թվականի ընտրարշավից, ՉԺՀ-ն իրականացրել է գործողություն, որը, ինչպես համարվում է, դարձել է ընտրությունների վերաբերյալ տվյալների արտահոսքի ամենախոշոր դեպքը պատմության մեջ»,- ասել է Թրամփը։ Նրա խոսքով՝ չինական իշխանությունների տնօրինության տակ են հայտնվել ամերիկացի ընտրողների անունները, հասցեները, հեռախոսահամարները, կուսակցական պատկանելությունը և այլ տեղեկություններ։ Նման տվյալները, ինչպես նշել է Թրամփը, եղել են «գնված, գողացված կամ ձեռք բերված կոտրելու (հակերային հարձակման) միջոցով»։

Խոսելով ընտրական համակարգի անկատարության մասին՝ Թրամփը նաև հայտարարել է, որ չորս նահանգներում որպես ընտրող գրանցված է եղել շուրջ 278 հազար մարդ, ովքեր չունեն ԱՄՆ քաղաքացիություն։