Վրացի պատգամավորը կալանավորվել է «օրենքով գողերի» հետ կապերի մեղադրանքով

Ծագերիի սակրեբուլոյի (տեղական ավագանու) անդամ Լաշա Լետոդիանին վրացի իրավապահների իրականացրած լայնամասշտաբ հատուկ գործողության արդյունքում ձերբակալված 26 անձանց թվում է:

Վրաստանում իրականացված լայնամասշտաբ հատուկ գործողությունն ուղղված է եղել «օրենքով գողերի» աշխարհի ենթադրյալ անդամների և նրանց հովանավորների դեմ, որի արդյունքում ձերբակալվել է նաև Ծագերիի սակրեբուլոյի անդամ Լաշա Լետոդիանին։ Ըստ քննության վարկածի՝ Լետոդիանին կապեր է ունեցել քրեական միջավայրի ներկայացուցիչների հետ, մասնակցել է նրանց միջև ծագած վեճերի լուծմանը և օգնել այսպես կոչված «գողական օբշչակի» հավաքագրմանը։ Լետոդիանին Ծագերիի ավագանիում գլխավորում է «Ժողովրդի ուժ» խմբակցությունը, որը նախորդ ընտրություններին մասնակցել է իշխող «Վրացական երազանք» կուսակցության հետ դաշինքով։

Դատախազության պնդմամբ՝ պատգամավորը մի քանի ամիս շարունակ աջակցել է «օրենքով գողերի» աշխարհի ներկայացուցիչների գործունեությանը, վարձատրության դիմաց մասնակցել է ֆինանսական վեճերի լուծմանը և կապ է պահպանել քրեական հեղինակություն Շալվա Նակեուրիի հետ։ Քննությունը նաև հայտարարում է, որ Լետոդիանին փորձել է կապ հաստատել արտերկրում գտնվող, այսպես կոչված, «օրենքով գող» Բեսիկ Ջափարիձեի հետ։ Մեղադրանքի համաձայն՝ քննությունն ունի ձայնագրություններ, որոնցում վեճի մասնակիցները, իբր, սպառնում են հաշվեհարդար տեսնել պարտապանների հետ և բռնություն կիրառել նրանց հարազատների նկատմամբ։ Դատախազությունը պնդում է, որ ապացույցների մի մասը ձեռք է բերվել Լետոդիանիի մեքենայում տեղադրված գաղտնալսող սարքի միջոցով։

Պատգամավորը հերքում է մեղադրանքները։ Նրա փաստաբանը հայտարարել է, որ Լետոդիանին չի ընդունում իր մեղքը և չի հասկանում իրեն ներկայացված պահանջների էությունը։ Թբիլիսիի քաղաքային դատարանը Լետոդիանիի և գործով անցնող ևս ինը մեղադրյալների նկատմամբ որպես խափանման միջոց է ընտրել կալանավորումը՝ մինչև քննության ավարտը։ Պաշտպանական կողմը խնդրել էր պատգամավորին ազատ արձակել գրավի դիմաց, սակայն դատարանը պաշտպանել է դատախազության դիրքորոշումը՝ մատնանշելով վկաների վրա հնարավոր ճնշում գործադրելու, ապացույցները ոչնչացնելու կամ թաքնվելու փորձերի ռիսկերը։

Քննությունն ընթանում է Վրաստանի քրեական օրենսգրքի այն հոդվածներով, որոնք վերաբերում են «օրենքով գողերի» աշխարհի գործունեությանը աջակցելուն, հանցավոր խմբավորմանը մասնակցելուն և զենքի ապօրինի շրջանառությանը։ Մեղքը հաստատվելու դեպքում մեղադրյալներին կարող է սպառնալ մինչև 15 տարվա ազատազրկում։ Հատուկ գործողությունն իրականացվել է հուլիսի 8-ին։ Իրավապահներն ընդհանուր առմամբ ձերբակալել են 26 հոգու, ևս երեքին մեղադրանք է առաջադրվել հեռակա կարգով։ Ըստ քննության վարկածի՝ կասկածյալների մի մասը գումարի դիմաց որպես միջնորդ է հանդես եկել քրեական աշխարհի հակամարտություններում՝ հակամարտող կողմերի վրա ճնշում գործադրելու համար ներգրավելով հանցավոր հիերարխիայի բարձրագույն ներկայացուցիչներին։