Բենզինի սուր դեֆիցիտ՝ ՌԴ մարզերից մեկում հատուկ դրություն է հայտարարվել

Նովոսիբիրսկի մարզի իշխանությունները տեղական կազմակերպություններին հորդորել են աշխատակիցներին տեղափոխել հեռավար աշխատանքային ռեժիմի: Այս առաջարկը չի վերաբերում միայն բնակչության կենսապահովման ոլորտի ձեռնարկություններին: Նման քայլի պատճառը տարածաշրջանում բենզինի մատակարարման հետ կապված խնդիրներն են, որոնց հետևանքով նահանգում հատուկ դրություն է հայտարարվել:

Համապատասխան որոշումը ստորագրել է Նովոսիբիրսկի մարզի նահանգապետի պաշտոնակատար Կոնստանտին Խալզովը։ Փաստաթղթի համաձայն՝ անկախ կազմակերպաիրավական ձևից, բոլոր գործատուներին խորհուրդ է տրվում կրճատել վառելիքի ծախսը՝ միաժամանակ բացառելով սոցիալական ու տնտեսական գործընթացների հնարավոր խաթարումները և պահպանելով օրենսդրության պահանջները:

Բացի այդ, տեղի բնակիչներին կոչ է արվել հնարավորինս սահմանափակել անձնական տրանսպորտային միջոցների կիրառումը ինչպես բնակավայրերի ներսում, այնպես էլ մարզի սահմաններից դուրս մեկնելիս: Ուղևորությունների անհրաժեշտության դեպքում քաղաքացիներին խորհուրդ է տրվում նախապես ստուգել և ապահովել մեքենայի վառելիքի բավարար պաշարը՝ երկկողմանի ճանապարհի համար:

Նովոսիբիրսկի մարզում բարձր պատրաստվածության ռեժիմը մեկնարկել է հուլիսի 8-ից և ուժի մեջ կմնա մինչև հատուկ կարգադրության արձակումը: Սահմանափակումների հիմնական պատճառը վառելիքի ապահովման հարցում առաջացած բարդություններն են: