13:00 Լուրերը մեկ տողով. Երևանից Հնդկաստան ուղարկված կենդանիներ. Քոչարյանը՝ դատարանում

Անցած ժամվա լուրերը՝ հակիրճ և բովանդակային.

•Երևանի կենդանաբանական այգուց Հայաստանի Կարմիր գրքում գրանցված կենդանիների զանգվածային տեղափոխում է իրականացվել հնդկական վերականգնողական կենտրոն: Հետաքննությունը պարզել է, որ նվիրատվությունը կատարվել է առանց հանրային պատշաճ իրազեկման, իսկ որոշ կենդանիներ անկել են դեռ տեղափոխման նախապատրաստական փուլում:

•Արտաքին հետախուզության ծառայությունը կարող է անձամբ դիտարկել իր շենքերի տանիքներին կապի սարքավորումներ տեղակայելու հնարավորությունը և պայմանագրեր կնքել օպերատորների հետ: Համապատասխան օրենսդրական նախագիծն արդեն ներկայացվել է հանրային քննարկման:

•ՀՀ երկրորդ նախագահ Ռոբերտ Քոչարյանը Մարտի 1-ի գործով դատական նիստում հայտարարել է, որ չի հասկանում իրեն առաջադրված մեղադրանքը: Նա ընդգծել է, որ իր գործողություններն օրինական են եղել, իսկ ընթացող դատավարությունը որակել է որպես հրապարակային քաղաքական պատվեր:

•Եվրամիության երկրների միջև առկա տարաձայնությունները կարող են խոչընդոտել Ռուսաստանի դեմ պատժամիջոցների նոր փաթեթի ընդունմանը։ Հիմնական վեճը վերաբերում է ռուս զինծառայողների մուտքի արգելքին, որին միության ոչ բոլոր պետություններն են աջակցում։

•Ուկրաինայի զինված ուժերն ակտիվացրել են հարձակումները Ղրիմի ուղղությամբ՝ թիրախավորելով նաև ծովային երթուղիները։ Չորս օրում Ազովի ծովում հարվածների է ենթարկվել Ռուսաստանի ստվերային նավատորմի հետ կապված շուրջ 25 նավ։

•Ադրբեջանի տարածքով Ռուսաստանից Հայաստան կփոխադրվեն պրոպանով և պարարտանյութերով բեռնված վագոններ: Տարանցիկ այս ուղիով նախկինում ևս Հայաստան են տեղափոխվել մեծ քանակությամբ վառելիք, հացահատիկ և այլ ապրանքներ։