14:00 Լուրերը մեկ տողով. «Հորս արև, ղրգելու եմ, էլի տասովկեք կա անելու». նոր ձայնագրություն, Իրանից հեղուկ գազ կբերվի

Անցած ժամվա լուրերը՝ հակիրճ և բովանդակային.

·  Հակակոռուպցիոն կոմիտեն հայտարարել է ընտրակաշառքի գործի բացահայտման մասին․ ձերբակալվել են մի շարք անձինք, իրականացվել են խուզարկություններ։ Ըստ նյութերի՝ ընտրողներին գումար է առաջարկվել ընտրությունների ընթացքում կոնկրետ քաղաքական ուժի օգտին քվեարկելու դիմաց։ 

·  Էկոնոմիկայի նախարարությունը հայտնել է, որ Հայաստանում հեղուկ գազի մատակարարումները վերականգնվել են, իսկ Իրանից ներմուծման խնդիրը լուծվել է։ Սպասվում է, որ առաջիկայում գազի գները որոշ չափով կնվազեն։ 

·  Հայաստանի և Թուրքիայի միջև մեկնարկել է ուղիղ առևտուրը։ Կառավարության գնահատմամբ՝ սա կնվազեցնի բիզնեսի ծախսերն ու մատակարարման ժամկետները։ 

·  ՍԱՏՄ-ն սանիտարահիգիենիկ խախտումների պատճառով կասեցրել է «Պիցցա Տաշիր»-ի երևանյան մասնաճյուղի արտադրական գործունեությունը։ Ընկերությանը տրվել է ժամկետ՝ խախտումները վերացնելու համար։ 

·  Սիսիանում 12-ամյա տղայի նկատմամբ բռնության և նվաստացման դեպքով նախաձեռնվել է քրեական վարույթ։ Իրավապահները պարզել են, որ դեպքին առնչություն ունեն երկու անչափահաս։ 

·  Դմիտրի Մեդվեդևը հայտարարել է «Սարմատ» հրթիռային համալիրի հաջող փորձարկման մասին՝ այն ներկայացնելով որպես ազդակ արևմտյան երկրների համար։ 

·  Ուկրաինայի ԱԳ նախարարը հայտարարել է, որ պատերազմը երկրի համար օրական հարյուրավոր միլիոնավոր դոլարների ծախս է առաջացնում։ Նա ընդգծել է, որ խաղաղության հասնելու համար անհրաժեշտ է ԱՄՆ-ի ակտիվ ներգրավվածությունը։