Զանգվածային արտաքսումներ՝ Վրաստանից․ օտարերկրացիների համար կանոներ են խստացվել

Վրաստանի ՆԳՆ միգրացիոն դեպարտամենտի իրականացրած վերջին միջոցառումների արդյունքում երկրից վտարվել է 78 օտարերկրյա քաղաքացի։  Այս մասին գրում է «ՏԱՍՍ»-ը։

Վրաստանի իրավապահ մարմինների փոխանցմամբ՝ երկրից արտաքսված 78 անձանց թվում կան Ռուսաստանի, Ադրբեջանի, Բելառուսի, Թուրքիայի, Չինաստանի, ինչպես նաև Հնդկաստանի, Պակիստանի, Եգիպտոսի, Ինդոնեզիայի և աֆրիկյան տարբեր երկրների քաղաքացիներ։ 

Նշված անձինք վարչական պատասխանատվության են ենթարկվել երկրում գտնվելու իրավական հիմքերը խախտելու համար, ինչի հետևանքով կայացվել է նրանց վտարելու որոշում։ Բացի արտաքսումից, բոլոր իրավախախտների համար օրենսդրությամբ սահմանված ժամկետներով արգելվել է հետագա մուտքը Վրաստանի տարածք։

Վերջին շրջանում երկրի իշխանությունները խստացրել են անօրինական միգրացիայի դեմ պայքարը։ Վրաստանի խորհրդարանի ընդունած օրենսդրական նոր փոփոխություններն էապես պարզեցրել են միգրանտների նկատմամբ վերահսկողության և արտաքսման գործընթացները։ Ուժային կառույցներն այժմ պարբերաբար՝ ամսական կտրվածքով, հանրությանը տեղեկացնում են տասնյակ օտարերկրացիների հեռացման նմանատիպ դեպքերի մասին։