Որոշ տեղեկություններով՝ ապրիլի վերջին հանդիպել են հայ և թուրք դիվանագետները. Արեշև
Տեղեկություններ կան, որ ապրիլի վերջին Թբիլիսիում անցկացվել է հայ և թուրք դիվանագետների հանդիպում։ Այս մասին Newsam -ի թղթակցի հետ զրույցում հայտարարել է ռուս քաղաքագետ Անդրեյ Արեշևը։
«Ի՞նչ էին այնտեղ քննարկում։ Հաղորդակցության ի՞նչ նախագծեր: Անհասկանալի է։ Կարելի է տարբեր վարկածներ առաջ քաշել, դրանց թվում՝ Հայաստանի իշխանությունները ինչ-որ կերպ համաձայնել են Մեղրիով անցնող միջանցքի արտատարածքային գործարկմանը, չի բացառվում, Ադրբեջանի հետ գազի առևտրի դիմաց, ինչի մասին հայտարարել էր Ալիևը»,- ընդգծել է փորձագետը։
Նա նշել է, որ Հայաստանի իշխանություններին թվում է, թե Ադրբեջանի պահանջների կատարումը երկարաժամկետ խաղաղություն և կայունություն կապահովի։
«Ընդդիմությունը, որը համակարգված չի գործում, անհանգստացած է, որ Տավուշում Ադրբեջանի պահանջների կատարումը հանգեցնելու է նոր, ավելի կոշտ պահանջների։ Սակայն, սահմանների սահմանազատման գործընթացը, այսպես թե այնպես, շարունակվելու է»,–նշել է Արեշևը։
Նա ընդգծել է, որ Տավուշից հետո հերթը հասնելու է Երևանը Սյունիքի ու Իրանի հետ կապող Տիգրանաշենին։ Քաղաքագետը չի բացառել, որ այդ առնչությամբ նաև բողոքի ցույցեր կլինեն, սակայն հասարակական տարբեր խմբերը քիչ բան կարող են անել Բաքվի և Երևանի համակարգված և համատեղ որոշման դեմ:
«Իսկ այն, որ նման լուծում կա, կասկածից վեր է»,- ընդգծել է փորձագետը։
Ըստ նրա, այս որոշմանն անմիջականորեն աջակցում են միջազգային խաղացողները, այդ թվում՝ ՄԱԿ-ը։ Ռուսաստանն ու Իրանն իրենց հերթին ի գիտություն են ընդունել դա և ի վիճակի չեն այս որոշման վրա ազդելու։
«Այստեղ կարևոր է, որ Հայաստանի կառավարությունը երկու քայլ առաջ է նայում Վրաստանի և հետևաբար Ռուսաստանի, ինչպես նաև Իրանի հետ հաղորդակցական կապեր ապահովելու առումով։ Սակայն դեռ պարզ չէ, թե ինչպես է այս հարցը լուծվելու»,- շեշտել է քաղաքագետը։
Արեշևը համոզմունք է հայտնել, որ Իրանի արձագանքը կհանգեցնի դիվանագիտական ակտիվության և Բաքվի հետ հնարավոր բանակցությունների։
Ինչ վերաբերում է վճռական գործողություններին, ըստ Արեշևի, Իրանը շատ այլ խնդիրներ ունի։ Թեհրանի համար Հարավային Կովկասի տարածաշրջանում կարևոր է կայունությունը։
Նշենք, որ Հայաստանի իշխանությունները բազմիցս հանդես են եկել տարածաշրջանում հաղորդակցությունների ապաշրջափակման օգտին։ Ընդ որում, Երևանն ընդգծել է, որ բոլոր կոմունիկացիաները պետք է գտնվեն այն երկրների իրավասության ներքո, որոնցով դրանք անցնում են։
