Հայ ռազմագերների նկարահանումից հետո ինտենսիվանում է ճնշումը նրանց նկատմամբ. Սիրանուշ Սահակյան

Ադրբեջանական լրատվամիջոցներով հայ ռազմագերիներին տեսանկարահանելու նպատակը միջազգային հանրությունում մարդու իրավունքների առնչությամբ Ադրբեջանի հեղինակությունը բարձրացնելն է, ինչպես նաեւ պատրաստված է ներքին լսարանի համար: Այս մասին NEWS.am-ի հետ զրույցում ասել է Միջազգային եւ համեմատական իրավունքի կենտրոնի նախագահ Սիրանուշ Սահակյանը:

Նշվում է, որ ադրբեջանական հանրային հեռուստաընկերությունը տեսանկարահանել է հայ ռազմագերիներին, որոնք պատմում են, թե իբրեւ լավ պայմաններում են պահվում:

«Այստեղ մենք տեսնում ենք, որ ադրբեջանական մարդասիրությամբ վերադասում են իրենց հայերից, մյուս կողմից հանրային հետաքրքրություն են առաջացնում ռազմագերիների հանդեպ: Այս տեսանյութերի տարածումը գեներացնում է նաեւ ատելություն: Նրանք այդ ատելության մակարդակն են նաեւ կառավարում հասարակության ներսում: Այդ տեսանյութում խոսող բոլոր ռազագերիների կամքը ազատ չէ: Նրանք կաշկանդված են եւ գտնվում են կյանքի սպառնալիքների ներքո, չեն կարող կամային գործողություններ կատարել: Տեսանյութերի նկարահանմանը նախորդող եւ հաջորդող փուլերում նաեւ ինտենսիվանում է ճնշումը՝ բոլոր դրսեւորումներով, այդ թվում՝ հոգեբանական: Պետք է փաստենք, որ ռազմագերիների կամարտահայտությունը ազատ չէ եւ մասնագիտական կարծիքների միջոցով էլ կարելի է դա հաստատել»,- նշել է Սիրանուշ Սահակյանը:

Սահակյանն ասել է, որ տեսանյութում պատերազմից հետո Խծաբերդի հատվածից գերեվարված գյումրեցի պահեստազորայիններն են եւ երկու զինծառայողներ, որոնք Գեղարքունիքի հատվածից էին գերեվարվել:

Հարցին՝ թե ի՞նչ օգուտ է սա տալու Ադրբեջանին, Սիրանուշ Սահակյանը պատասխանել է. «Եթե առհասարակ աշխատանք չտարվի, ապա անհնար կդառնա երկրի լեգիտիմությունը պաշտպանելը, եւ նրանք էլ ընտրել են կեղծարարական մեթոդը»:

Անդրադառնալով հայ ռազմագերների հայրենադարձման խնդրին, Սիրանուշ Սահակյանն ասել է, որ իրավական գործընթացներն իրենց բնականոն ճանապարհով զարգանում են, արտասովոր զարգացումներ չկան.

«Տեսնում ենք, որ քաղաքական առումով նաեւ փոխհամաձայնեցնում են ռազմագերիների փոխանակման հարցը: Եվ սպասում կար, որ այս շաբաթների ընթացքում հայրենադարձում տեղի կունենար եվրոպական միջնորդությամբ: Այս հետաձգմանը զուգընթաց մենք սադրիչ գործելակերպ ենք տեսնում Ադրբեջանի կողմից: Օրինակ՝ ադրբեջանական դիվերսանտների ձերբակալումից հետո տեսանք, որ Ադրբեջանը առեւանգեց երկու զինծառայողների, եւ նրանց մատուցեց որպես դիվերսանտներ, ինչ-որ առումով դա եւս իրավական հարթության մեջ ուժի ցուցադրություն էր Հայաստանի հանդեպ:

Կանխատեսելի է, որ գործարքի արդյունքում եվրոպական կամ այլ երկրների միջնորդությամբ, եթե հայկական կողմը որոշ քաղաքական խնդիրների բավարարում տա, ապա դրան կհաջորդի ռազմագերիների խնդրի լուծումը»:

Նշվում է, որ Բաքվում 33 հաստատված հայ ռազմագերի կա, ինչպես նաեւ երկու զինծառայող, որոնք մայիսի 26-ին էին գերեվարվել: Սիրանուշ Սահակյանի խոսքով՝ 80 չհաստատված գերեվարման փաստ կա, սակայն նրանց մասով տեղեկությունների պակաս կա: