ԳՇ նախկին պետ Օնիկ Գասպարյանն առաջիկայում պաշտոն կստանա. ԶԼՄ

Մարտի 14-ին հայտնի դարձավ, որ Տիգրան Փարվանյանն ազատվել է հայ-ռուսական միացյալ զորախմբի հրամանատարի պաշտոնից՝ համաձայն նախագահի հրամանագրի։ Փարվանյանն այս պաշտոնը զբաղեցնում էր 2018 թվականի փետրվարից։  Այս մասին գրում է MediaHub-ը:

«Եվ ահա մեզ փոխանցեցին, որ Օնիկ Գասպարյանի «ներդրած ավանդի» դիմաց՝ ոչ միայն տարիների ծառայության, այլ հատկապես լռություն պահպանելու և գործող իշխանության դեմ չգնալու համար Փաշինյանը որոշել է նրան նոր պաշտոն տալ: 

Թերևս այս հանգամանքով է պայմանավորված այն, որ Փարվանյանի պաշտոնանկությունից ընդամենը երկու օր անց Օնիկ Գասպարյանը 44-օրյա պատերազմի հանգամանքներն ուսումնասիրող Ազգային ժողովի քննիչ հանձնաժողովում էր, խոսել է մի քանի ժամ ու, ըստ արձագանքների, իշխանությանը գոհացրել է:

Այդպես, նիստից հետո հանձնաժողովի ՔՊ-ական Անդրանիկ Քոչարյանը, պատասխանելով լրագրողների հարցերին, թե արդյոք Օնիկ Գասպարյանն ապագայում նորից վերադառնա Հայաստանի զինված ուժեր, իշխանությունն ունի՞ այդպիսի պլաններ, ասել էր.

«Օնիկ Գասպարյանն ի վիճակի է ոչ միայն անել վերլուծություններ, արձանագրի փաստեր, այլ նաև իր անցած ճանապարհով կարող է նաև մեր կրթական ծրագրերի մեջ ունենա իր ուրույն մասնակցությունը»:

Նա նաև ասել էր, որ «աշխատանքի ավարտից հետո կտեսնեն, թե ինչ եզրակացության վրա կկանգնեն»:

Մինչդեռ, հիշեցնենք, Օնիկ Գասպարյանը կարող էր իրավիճակ փոխել թե՛ 44-օրյա պատերազմի օրերին, թե՛ դրանից հետո: Պարզապես չուզեց կամ վախեցավ:

Նշենք նաև, որ սովորության համաձայն՝ Օնիկ Գասպարյանը մեր հեռախոսազանգերին չպատասխանեց»: