ԱՀԱԶԱՆԳ. Ու՞ր են տեղափոխում Երևանի կտրած ծառերը. վաճառվո՞ւմ են
Երեկ վաղ առավոտից Երևանի կենտրոնում «Կանաչապատում և շրջակա միջավայրի պահպանություն» ՀՈԱԿ-ի աշխատակիցները իրականացնում էին ծառերի հատում, ինչը դժգոհությունների ու քննադատությունների պատճառ էր դարձել հանրության շրջանում։ Մարդիկ դժգոհում են, որ մայրաքաղաքը զրկվում է առանց այդ էլ սակավ բուսականությունից և կասկածներ ունի, թե արդյոք իրապես այդ ծառերը ենթակա էին հատման։
Ավելի վաղ Երևանի քաղաքապետարանի «Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանը Կասկադի տարածքում լրագրողների ու քաղաքացիների հետ զրույցում հավաստիացրել էր, որ կտրված ծառերը հենց վաղը փոխարինվելու են առավել գեղեցիկ, կենսունակ ծառերով:
Սակայն Auroranews-ին ազազանգում են Երևանի բնակիչները` խնդրելու պարզել` ո՞ւր են տանում արդեն իսկ կտրատված ծառերը. նրանք կասկածներ են հայտնել, որ դրանք անօրինական վաճառվում են:
Երևանի քաղաքապետարանի աշխատակազմի տեղեկատվության և հասարակայնության հետ կապերի վարչությունից Auroranews-ին ասացին, որ փտած ծառերը, վարչական շրջանների դիմումների համաձայն, որոնք որ ուղարկվում են ՀՈԱԿ-ին, բաժանվում են անապահով բնակիչներին, կարիքավորներին, ովքեր որ վառելիքի կարիք ունեն:
«Որոշակի ծառեր, որոնք որ լրիվ փտած չեն և պիտանի են, դրանցից նախատեսում են նստարաններ և դեկորատիվ այլ առարկաներ պատրաստել, որոնք հետագայում կօգագործվեն այգիներում: Ինչ վերաբերում է կտրած ծառերի անօրինական վաճառքին, ապա դա ապատեղեկատվություն է: Ինչպես կարելի է վաճառել այդ փտած ծառերը»-նշեցին Երևանի քաղաքապետարանի աշխատակազմի տեղեկատվության և հասարակայնության հետ կապերի վարչությունից` հավելելով, որ այդ գործընթացը վերահսկվում է ՀՈԱԿ-ի կողմից, սակայն ընդհանուր վերահսկողություն քաղաքապետարանը իրականացնում է:
