Լատվիայում արդեն վաղը «Дождь» հեռուստաալիքի հեռարձակման լիցենզիան կչեղարկվի: Այս մասին որոշում է ընդունել Էլեկտրոնային լրատվամիջոցների տեղական ազգային խորհուրդը։ Խորհրդի ղեկավար Իվարս Աբոլինսն ասել է, որ որոշումն ընդունվել է «ազգային անվտանգությանը և հասարակական կարգին սպառնացող վտանգի պատճառով»:

«Գնահատելով խախտումների ամբողջությունը՝ խորհուրդը համոզվեց, որ «Дождь» ղեկավարությունը չի հասկանում և տեղյակ չէ խախտումների նշանակությանն ու լրջությանը, հետևաբար չի կարող գործել Լատվիայի տարածքում»,- հավելել է նա։ 

Աղմկահարույց սկանդալի մասին իրենց կարծիքն են հայտնել Դմիտրի Պեսկովը, Միխայիլ Պոդոլյակը, լրագրողներ:

Առանձնացրել ենք նրանցից մի քանիսի մեկնաբանությունը.

Դմիտրի Պեսկով

Ռուսաստանի նախագահի մամուլի քարտուղար

 «Ինչ-որ մեկին անընդհատ թվում է, թե ինչ-որ տեղ ավելի լավ է, քան տանը: Եվ անընդհատ ինչ-որ մեկին թվում է, թե ինչ-որ տեղ ազատություն կա, իսկ տանը ազատություն չկա։ Սա ամենավառ օրինակներից մեկն է, որը ցույց է տալիս նման պատրանքների սխալ լինելը»։

Միխայիլ Պոդոլյակ

Ուկրաինայի նախագահի աշխատակազմի ղեկավարի խորհրդական

 «Ներքին գրաքննություն, կներեք, մեզանից յուրաքանչյուրը պետք է ունենա։ 

Ինձ թվում է՝ և՛ տիկին Կոտրիկաձեն, և՛ պարոն Ձյադկոն հստակ դիրքորոշում են ընդունել, հստակ դրել են շեշտադրումները, կայացրել են համապատասխան որոշումներ, այդ թվում՝ կառավարչական, և բացատրել են իրենց դիրքորոշումը` բացարձակապես հակապատերազմական և ուկրաինամետ»:

Մայքլ Մաքֆոլ

Ռուսաստանում ԱՄՆ նախկին դեսպան

 «Ինձ համար անհասկանալի է Լատվիայի կառավարության այս որոշումը։ Ես գիտեմ, որ ինչ-որ մի հիմար ինչ-որ հիմար բան է ասել «Дождь»-ի վրա: Բայց այս մի սխալը պետք է կշռել Պուտինի հանցավոր ու բարբարոս պատերազմի մասին միլիոնավոր ճշմարտությունների ու փաստերի հետ, որոնք հեռարձակվել են նաև «Дождь» -ով»։

Աննա Մոնգաիթ

«Дождь»-ի հաղորդավար

 «Լատվիան հետ է կանչել «Дождь»  ընկերության լիցենզիան. Մենք շարունակում ենք աշխատել, մնում ենք YouTube-ում, բայց կորցնում ենք կաբելային ցանցի մի մասը։ Մենք գիտենք, թե ինչպես հաղթահարել էպիկական մասշտաբի դժվարությունները և մեր առաքելությունը կատարված չենք համարում։ Բայց ասեմ, որ տեղի ունեցողի մեջ իր բաժինն ունի յուրաքանչյուր հեյթեր, ով այս օրերին ոտնահարեց «Дождь»-ը՝ մեզ մեղադրելով մի հանցագործության մեջ, որը մենք չենք արել»։

«Լրագրողներ առանց սահմանների»

լրագրողներին պաշտպանող միջազգային հասարակական կազմակերպություն

 «Մենք խորապես ափսոսում ենք Լատվիայի կարգավորող մարմնի՝ վտարանդի վիճակում գտնվող ռուսական անկախ «Дождь»  հեռուստաալիքի լիցենզիան չեղյալ հայտարարելու համար։ Թեև այն, ինչի համար մեղադրում են հեռուստաալիքին, իսկապես արժանի է քննադատության, դա լուրջ հարված է տեղեկատվության ազատությանը»։

Կիրա Յարմիշ

Նավալնիի թիմի մամուլի քարտուղար

 «Կա Վլադիմիր Պուտինը, ով սկսեց պատերազմը. Կա «Дождь»  ալիքը, որն ասում է ճշմարտությունը Պուտինի և պատերազմի մասին։ «Дождь» -ին լիցենզիայից զրկելը օգնում է Պուտինին, և իհարկե ոչ հակառակը»։

Ալեքսեյ Վենեդիկտով

«Էխո Մոսկվի» ռադիոկայանի նախկին գլխավոր խմբագիր

 «Իմ համերաշխությունը «Дождь»-ին անփոփոխ է. Տիխոն (Ձյադկո), Կատյա (Կոտրիկաձե), Նատաշա (Սինդեևա)»:

Կարեն Շահինյան

լրագրող 

 «Ի՜նչ ցինիզմ ու կեղծավորություն։ Եվ ինչպիսի՞ օպերատիվություն, օրինակ, երկու օր պահանջվեց նրանց հետաքննության համար...

Հարգելի, սիրելի գործընկերներ, դուք շատ ավելին եք, քան բոլոր նրանя, ովքեր բռնում են ձեզ անճշտությունների մեջ, նախանձում և ատում: Դուք միշտ նայում եք ապագային և կառուցում այն, ես հպարտ եմ, որ մի փոքր ներգրավված եմ դրանում և ընկերություն եմ անում ձեզ հետ, իսկ ձեր թշնամիները նայում են անցյալին, և դուք կգերազանցեք նրանց բոլորին: Ես սիրում եմ ձեզ և այսօր մտածում եմ միայն ձեր մասին»։

«Дождь» հեռուստաալիքը դադարեցրեց իր աշխատանքը Ռուսաստանում դեռ մարտի սկզբին, այն բանից հետո, երբ երկրում լրագրողները սկսեցին քրեական պատասխանատվության ենթարկվել ՌԴ Քրեական օրենսգրքի «ռազմական կեղծիքների» մասին նոր հոդվածով։ Ավելի ուշ հեռուստաալիքին հաջողվել է աշխատանքի թույլտվություն ստանալ Լատվիայում, որտեղ արգելված են ռուսական պետական ​​հեռուստաալիքները։ 

Հեռուստաալիքի հեռարձակման դադարեցման որոշումը ուժի մեջ կմտնի հինգշաբթի՝ դեկտեմբերի 8-ի գիշերը, և «Дождь»-ը կդադարեցնի հեռարձակումը Լատվիայի տարածքում։ 

Հաշվի առնելով, որ «Дождь» հեռուստաալիքը հեռարձակվում է ոչ միայն հեռուստատեսությամբ, այլև YouTube-յան հարթակով, NEPLP-ը կխնդրի աշխարհագրորեն արգելափակել ալիքն այս հարթակում, որպեսզի բովանդակությունը հասանելի չլինի Լատվիայում, հայտարարել է Աբոլինսը