«Միտում եմ տեսնում, որ կարող է շուռ տան ու մեղադրեն քաղաքացիներին»․ պատգամավորը` պարեկների կողմից ծեծի ենարկված քաղաքացիների մասին
ԱԺ «Հայաստան» խմբակցության պատգամավոր Քրիստինե Վարդանյանը ասուլիսի ընթացքում անդրադարձել է նոյեմբերի 26-ին Պարեկային ծառայության աշխատակիցների կողմից Լոռու մարզի մի քանի քաղաքացիների դաժան ծեծի ենթարկելու դեպքին․
«Միջադեպն ունի երկու կողմ՝ մի կողմում Պարեկային ծառայության աշխատակիցներն են, որը չի հերքվել, մյուս կողմում՝ հիվանդանոցում հայտնված քաղաքացիները։ Միջադեպի արդյունքում միայն քաղաքացիներն են ստացել վնասվածքներ, այդ թվում՝ անչափահասը։ Հիմա միտում եմ տեսնում, վտանգ եմ զգում, որ կարող է փորձ արվել հակառակը շուռ տալ, և փորձել այնպիսի պատկեր ստանալ, թե քաղաքացիներն են մեղավոր»։
Հիշեցնենք, որ նույն պատգամավորին հայտնած տեղեկատվության համաձայն` տեղի էր ունեցել այն ժամանակ, երբ Պարեկային ծառայությունը փորձել էր ճանապարհն ազատել Նիկոլ Փաշինյանի շարասյան համար:
Նա մասնավորապես գրել էր.
«Ահազանգ եմ ստացել Լոռու մարզի բնակիչներից առ այն, որ երեկ մի քանի քաղաքացիներ դաժան ծեծի են ենթարկվել Պարեկային ծառայության աշխատակիցների կողմից:
Ըստ քաղաքացու, ում հետ զրուցեցի քիչ առաջ, միջադեպը տեղի է ունեցել այն բանից հետո, երբ Պարեկային ծառայությունը փորձել է ճանպարհն ազատել Նիկոլ Փաշինյանի շարասյան համար և այդ ընթացքում վեճի է բռնվել տարեց քաղաքացու հետ, ով պարզապես խնդրել է իր հետ հարգանքով խոսել:
Խոսակցությանը միջամտել է տարեց քաղաքացու տղան, որից հետո միջադեպին միջամտել են ավելի մեծ թվով Պարեկային ծառայության աշխատակիցներ (մեկ տասնյակից ավել), ովքեր, ըստ քաղաքացու, դաժան բռնություն են կիրառել քաղաքացիական անձանց նկատմամբ` օգտագործելով նաև արցունքաբեր գազ:
Բռնության հետևանքով 2 քաղաքացի` այդ թվում նաև տարեց քաղաքացու անչափահաս թոռը բազմաթիվ վնասվածքներով, այդ թվում նաև կոտրվածքներով հայտնվել են հիվանդանոցում:
Ըստ քաղաքացու, այսօր ոչնչացվել են նաև միջադեպը տեսագրած տեսախցիկների նյութերը, իսկ իրենց հորդորել են որևէ կերպ չբարձրաձայնել դեպքի մասին:
Քաղաքացին խնդրում էր հնարավորինս հանրային ուշադրություն հրավիրել այս դեպքին:
Հրավիրում եմ ՀՀ ոստիկանության ուշադրությունը, պահանջելով անհապաղ պարզել դեպքի հանգամանքները, նշանակել ծառայողական քննություն, իսկ մինչ քննության ավարտը միջադեպին մասնակցած անձանց թույլ չտալ շարունակել կատարել ծառայողական պարտականությունները:
Հրավիրում եմ նաև իրավապաշտպանների ուշադրությունը, կոչ անելով թույլ չտալ միջադեպի արդյունքում տուժածների նկատմամբ ճնշումների գործադրմանը և օգնել նրանց պաշտպանել սեփական ոտնահարված իրավունքները»:
