Թալինում համայնքապետ ընտրվեց ՔՊ-ի թեկնածուն
Թալինում այսօր տեղի ունեցավ նորընտիր ավագանու անդրանիկ նիստը։
Նշենք, որ Թալինում կայացած ՏԻՄ ընտրությունների արդյունքում ՔՊ-ն ստացել էր 46.6 տոկոս ձայն, իսկ «Զարթոնք», «Հայք» և «Մեր համայնքը» չնայած քիչ ձայներ էին հավաքել, սակայն կոալիցիա ձևավորեցին և ավագանիում մեծամասնություն դարձան։
Նիստի ընթացքում ՔՊ-ն համայնքապետի թեկնածու առաջադրեց Տավրոս Ափեյանին, իսկ «Զարթոնք», «Հայք» և «Մեր համայնքը»-ն առաջադրեցին Դավիթ Մանուկյանի թեկնածությունը։ Ավագանիում ՔՊ-ն ունի 10 մանդատ, իսկ ընդդիմադիր կուսակցությունների ձևավորած կոալիցիան՝ 11 մանդատ։
Քվեարկության արդյունքում Թալինի համայնքապետ ընտրվեց ՔՊ-ի թեկնածու Տավրոս Ափեյանը։ Նրան կողմ էր քվեարկել ավագանու 11 անդամ, իսկ Դավիթ Մանուկյանին կողմ էր քվեարկել 10 անդամ։
Նշենք, որ ՔՊ-ի թեկնածուին կողմ քվեարկեց կոալիցիոն ուժի համայնքապետի նախկին թեկնածու Կարեն Գրիգորյանը, որն ընտրություններին մասնակցել էր «Հայք» կուսակցության ընտրական ցուցակով։
Թալինի նորընտիր համայնքապետ Տավրոս Ափեյանն էլ առանձնահատուկ շնորհակալություն հայտնեց Կարեն Գրիգորյանին։
