Սյունիքի համայնքապետերի գործերով պաշտպանները բողոքներ են ներկայացրել Վերաքննիչ դատարան. АrmDaily.am
Բողոք ենք ներկայացրել Վերաքննիչ դատարան այսօր, սպասենք, թե երբ պետք է նիստը հրավիրվի։ Այս մասին այսօր АrmDaily.am-ի հետ զրույցում հայտնեց Գորիսի համայնքապետ Առուշ Առուշանյանի պաշտպան Էրիկ Ալեքսանյանը։
Հիշեցնենք, որ ըստ մեղադրանքի՝ արտահերթ ընտրություններից մի քանի օր առաջ Առուշանյանը հանդիպել է վարչական ղեկավար Լուսինե Ավետյանին և առաջարկել ընտրություններից հետո դրամական օգնություն տրամադրել այն ընտրողներին, ովքեր կխոստանան ընտրել «Հայաստան» դաշինքին։ ՀՔԾ-ն ասում է, որ հանցագործությունը ավարտին չի հասցվել Առուշանյանի կամքից անկախ հանգամանքներով, քանի որ Քարահունջի ղեկավար Ավետյանը հրաժարվել է ընտրողներին հանդիպելուց և նրանց դրամական օգնության տեսքով կաշառք առաջարկելուց։
Նա տեղեկացրեց, որ այսօր առերես հարցաքննություն է տեղի ունեցել Լուսինե Ավետյանի հետ։
«Մենք հրաժարվել ենք առերես հարցաքննությանը մասնակցելուց»,- ասաց պաշտպանը։
Քննիչը սահմանափակել է նաև տեսակցություններն ու հեռախոսային զրույցները։
«Մենք այսօր դիմում ենք ներկայացրել քննիչին, որպեսզի այդ որոշումը տա և հասկանանք, թե ինչն է հիմք հանդիսացել այդ սահմանափակումը կիրառելու համար, որպեսզի հետագայում բողոքարկենք դատախազին»,- ասաց պաշտպանը։
Սիսիանի համայնքապետ Արթուր Սարգսյանի պաշտպան Էմին Խաչատրյանն էլ տեղեկացրեց, որ բողոքն արդեն մուտք է եղել Վերաքննիչ դատարան։
«Որևէ քննչական գործողություն՝ բացի մեղադրյալ ներգրավվելուց ու ցուցմունք տալուց, չի կատարվել»,- ասաց պաշտպանը՝ նշելով, որ տեսակցության ու հեռախոսային զրույցների արգելանք կիրառելու մասին տեղեկություն չունի։
«Որևէ մանրամասնություններ չկան։ Ի սկզբանե ինչպես դիրքորոշումս հայտնել եմ՝ հիմա էլ եմ ասում, որ ծանրակշիռ փաստական տվյալներ կային, որ պետք է մեր պաշտպանյալը չկալանավորվեր, սակայն դատարանի կողմից անտեսվեցին դրանք կամայականության արդյունքում։ Կամայական մեկնաբանություններ են տրվել պաշտպանական կողմի ներկայացրած փաստերին»,- ասաց պաշտպանը։
Հիշեցնենք, որ Սիսիանի համայնքապետին մեղադրանք է առաջադրվել պաշտոնեական դիրքի չարաշահման և պաշտոնեական կեղծիքի համար։
Քաջարանի համայնքապետ Մանվել Փարամազյանի պաշտպան Լուսինե Սահակյանը տեղեկացրեց, որ նույնպես բողոքարկում են ներկայացրել Վերաքննիչ դատարան։
Նա տեղեկացրեց, որ Փարամազյանի հետ որևէ քննչական գործողություն չի կատարվում, և կիրառվել է տեսակցությունների ու հեռախոսային զրույցների արգելանք, որը պատրաստվում են բողոքարկել։
Հիշեցնենք, որ Քաջարան համայնքի ղեկավար Մանվել Փարամազյանին մեղադրանք է առաջադրվել ՀՀ Քրեական օրենսգրքի 38-178-րդ հոդվածի 3-րդ մասով (խարդախություն), 311-րդ հոդվածի 4-րդ մասով (կաշառք ստանալը) և 154.2-րդ հոդվածի 2-րդ մասով (ընտրողի կամքի ազատ իրականացմանը խոչընդոտելը)։
