Եվս մեկ տուժող՝ Սյունիքի ներկա և նախկին մարզպետների որդիների վիճաբանության միջադեպով․ «Առավոտ»
Սյունիքի նախկին մարզպետ Սուրիկ Խաչատրյանի որդու՝ Տիգրան Խաչատրյանի (լուսանկարում) և ներկայիս մարզպետ Մելիքսեթ Պողոսյանի որդու՝ Կարեն Պողոսյանի միջև օրեր առաջ ՝ հուլիսի 13-ին տեղի ունեցած միջադեպի գործով ևս մեկ տուժող կա։ Հիշեցնենք, որ Տիգրան Խաչատրյանի և Կարեն Պողոսյանի միջև ծագած վիճաբանությունը վերածվել էր ծեծկռտուքի, այնուհետև հնչել են կրակոցներ։ Այս մասին հայտնում է «Առավոտ»-ը։
«Դեմքի ձախ կեսի հրազենային շոշափող վիրավորում, փափուկ հյուսվածքների ջնջխումով, ձախ ուսահոդի շրջանի շոշափող հրազենային վերք, որովայնի ստորին կեսի շոշափող հրազենային վերք, հեմորագիկ տրավմատիկ շոկ 2-րդ, 3-րդ աստիճան» ախտորոշմամբ հիվանդանոց էր տեղափոխվել Կարեն Պողոսյանի ընկերը՝ 34-ամյա Հարութ Վարդանյանն ու ձախ նախաբազկի վերին երրորդականի ծալիչ մակերեսի կտրած վերք 15-8 սմ ծալիչ մկանների նյարդերի վնասումով, գոտկային շրջանի ծակած-կտրած վերք ախտորոշմամբ Տիգրան Խաչատրյանի քեռին՝ 54-ամյա Մելիք Բարսեղյանը։ «Առավոտի» ունեցած տեղեկություններով, հուլիսի 18-ին, «Գորիս» բժշկական կենտրոնից ոստիկանության Գորիսի բաժին հաղորդում է ստացվել, որ «ձախ ծնկահոդի առաջային մակերեսի կեղեւապատած վերք» ախտորոշմամբ իրենց մոտ բուժօգնության է դիմել 39-ամյա Գագիկ Բաբայանը։ Պարզվել է, որ Գագիկ Բաբայանը վնասվածքը ստացել է հուլիսի 13-ին ժամը 23.00-ի սահմաններում, Գորիսի Գետափնյա եւ Գ. Նժդեհի փողոցների հատման խաչմերուկում՝ Կարեն Պողոսյանի եւ Տիգրան Խաչատրյանի միջեւ առաջացած վիճաբանության ժամանակ։
Կարեն Պողոսյանի կողմից միջադեպին ներկա է գտնվել Գագիկ Բաբայանը։ Այդ ընթացքում Տիգրան Խաչատրյանը ձեռքին եղած ատրճանակով կրակել է վերջինիս ձախ ոտքի ծնկահոդի շրջանին՝ պատճառելով նշված վնասվածքը: Բաբայանը նշված վայրից անմիջապես գնացել է տուն և չի դիմել հիվանդանոց՝ պատճառաբանելով, որ թեթև վնասվածք է, կանցնի:
Նշենք նաեւ, որ միջադեպի հանգամանքներով, հուլիսի 14-ին հարուցվել է գործ՝ «Քրեական օրենսգրքի» 34-104 հոդվածի (սպանության փորձ ), 258 հոդվածի 4-րդ մասի(խուլիգանությունը, որը զուգորդվել է անձի առողջությանը միջին ծանրության վնաս պատճառելով,) , 235 հոդվածի 1-ին մասի (ապօրինի կերպով հրազեն, բացի ողորկափող հրազենից եւ դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը՝) հատկանիշներով։
