Մենք շատ լավ ենք սկսել 2020 թվականը, որովհետեւ այն կառուցված է 2019 թվականի շատ լավ հիմքի վրա: Այս մասին այսօր մամուլի ասուլիսի ժամանակ ասաց ՀՀ Էկոնոմիկայի նախարար Տիգրան Խաչատրյանը:

«Արդեն հրապարակումներ եղել են, որ 11 ամիսների արդյունքներով մենք ունենք 7,5 տոկոս տնտեսական ակտիվություն: Քիչ կարեւոր չէ, որ հատկապես առաջատար աճ ունի արդյունաբերությունը՝ 9.3 տոկոս: Ծառայություններն աճել են գրեթե 15 տոկոսով, ներքին առեւտրաշրջանառությունը՝ 9.2 տոկոս, շինարարությունը 4.5 տոկոս, իսկ արտահանումն աճել է 9 տոկոսով: Սա նշանակում է, որ արդեն կարող ենք ասել, որ 2019-ին կունենանք առնվազն 7.5 տոկոս տնտեսական աճ, որը շատ կարեւոր ձեռքբերում է»,- ասաց Խաչատրյանը:

Նա անդրադարձավ նաեւ զբաղվածության խնդրին՝ նշելով. «Զբաղվածությունն ըստ պաշտոնական թվերի ունի 40 հազարով աճ: Ըստ ոլորտների դա բաժանվում է հետեւյալ կերպ. «5300-ը վերաբերում է վերամշակող արդյունաբերությանը, 12 400-ը՝ մեծածախ եւ մանրա, ծախ առեւտրին: 4300 աշխատատեղեր ավելացել են կացության եւ հանրային սննդի ոլորտում, 2300-ը՝ կապի եւ տեղեկատվության, 2100-ը՝ ՏՏ ոլորտում եւ 2700-ը՝ այլ ծառայություններում»:

Նախարարը հիշեցրեց, որ «Moody’s» եւ «Fitch» հեղինակավոր միջազգային կազմակերպությունների կողմից հրապարակված վարկանիշները Հայաստանի վերաբերյալ մեկ աստիճանով բարձր էին նախորդ գնահատման համեմատությամբ:

«Սա նշանակում է, որ ներդրողի կողմից Հայաստանը գնահատվում է ավելի բարենպաստ եւ ավելի քիչ ռիսկային, որ Հայաստանը միջազգային ներդրողի տեսանկյունից ավելի նպաստավոր է դարձել, ավելի հուսալի պայմաններ է խոստանում»,- ասաց նա:

Խաչատրյանը նշեց, որ ՄԱԿ-ի կառույցներից մեկի կողմից Հայաստանում ներդրումային միջավայրի վերաբերյալ զեկույց է պատրաստել. «Զեկույցն արձանագրում էր, որ Հայաստանում ներդրումային միջավայրն ընդհանուր առմամբ բարենպաստ է: Օտարեկրյա ներդրումների վերաբերյալ օրենսդրությունը համահունչ է միջազգային պրակտիկային, որ հայաստանում կան մի քանի ոլորտներ, որոնք խոստանում են ներդրումային շատ բարենպաստ միջավայր: Դրանք են ՏՏ ոլորտը, զբոսաշրջությունը եւ թեթեւ արդյունաբերությունը: Սա կողմնորոշիչ է միջազգային ներդրողների համար»: