Կրամատորսկի հիվանդանոցները չեն հասցնում սպասարկել հրթիռային հարձակումից տուժածների մեծ հոսքին

 Կրամատորսկի հիվանդանոցները չեն կարողանում հասցնել սպասարկել հրթիռային հարձակումից հետո բուժկենտրոններ տեղափոխված մեծաթիվ վիրավորներին։ Vesti.ua-ի հաղորդմամբ, այս մասին հայտարարել է Կրամատորսկի քաղաքապետ Ալեքսանդր Գոնչարենկոն։ Ավելի քան 100 տուժած արդեն տեղափոխվել է հիվանդանոց;

«Շատերը ծանր վիճակում են` առանց ձեռքերի, ոտքերի: 30-40 վիրաբույժներ միաժամանակ վիրահատում են նրանց»,- ասում է Գոնչարենկոն։

Քաղաքապետի խոսքով՝ հրթիռի բեկորները հայտնաբերվել են հարվածի էպիկենտրոնից 40 մետր հեռավորության վրա, ինչը վկայում է հրթիռի բարձր հզորության մասին։ Նա նաեւ հայտարարել է, որ հրետակոծության պահին կայարանում մոտ 4000 մարդ է եղել։

Վերջին տվյալներով՝ Կրամատորսկի երկաթուղային կայարանի հրթիռակոծության հետեւանքով զոհվել է 39 մարդ։ Զոհերի թվում կա 4 երեխա: