Ֆրանսիան Ուկրաինային 200 միլիոն եվրոյի վարկ կտրամադրի

Փարիզը Կիևին կտրամադրի 200 միլիոն եվրո վարկ՝ զարգացման ծրագրերի համար, ինչպես նաև 1 միլիարդ եվրոյի ֆինանսական երաշխիքներ, որոնց շրջանակներում Ուկրաինան կկարողանա վարկեր ստանալ ֆրանսիական բանկերից։ Այս մասին երեքշաբթի՝ փետրվարի 8-ին, հայտնել է Ուկրաինայի նախագահի գրասենյակի մամուլի ծառայությունը, գրում է kp.ru-ն:
 

«Ֆրանսիայի էկոնոմիկայի և ֆինանսների նախարարությունը Ուկրաինայի կառավարությանը կտրամադրի 200 միլիոն եվրոյի վարկ, ինչպես նաև 1 միլիարդ եվրոյի ֆինանսական երաշխիքներ», - նշվում է նախագահի հայտարարությունում, ըստ որի՝ հավաքագրված միջոցները կարող են ծախսվել կոնկրետ ծրագրերի վրա, որոնք նախապես համաձայնեցված են եղել Փարիզի հետ։
 

Ինչպես նշվում է, այդ միջոցների հատկացումը նախատեսում է ֆրանսիացի մատակարարների և կապալառուների ներգրավում դրանց իրականացման գործում։
 

Ավելի վաղ Ուկրաինայի նախագահ Վլադիմիր Զելենսկին հայտարարել էր, որ Փարիզը Կիևին կտրամադրի 1,2 միլիարդ եվրոյի մակրոֆինանսական օգնություն՝ տնտեսությունը կայունացնելու համար։