Հայաստանը իր ազգի շահերի հաշվին Թուրքիայի հետ հարաբերություններ չի կառուցի. Զարեհ Սինանյան
Համոզված եմ, որ Հայաստանը Թուրքիայի հետ հարաբերություններ չի կառուցի իր ազգի շահերի հաշվին։ Այս մասին դեկտեմբերի 23-ին հայտարարել է Հայաստանի վարչապետին առընթեր սփյուռքի հարցերով գլխավոր հանձնակատար Զարեհ Սինանյանը։
Հարեւանների հետ նորմալ հարաբերությունները, նրա խոսքով, բխում են Հայաստանի անվտանգությունից, բայց դրանք չպետք է կառուցվեն նրա ազգային պատվի, ապագայի եւ ինքնության հաշվին։ «Մինչեւ այս պահը ես չեմ տեսել որեւէ նախանշան, որ մեր կողմից Թուրքիայի հետ կապված որեւէ գործընթաց տեղի է ունեցել մեր ազգային հարցերի եւ պատմության հաշվին։
Եւ ես չեմ կարողանա համոզել սփյուռքին աջակցել Թուրքիայի հետ հարաբերությունների կարգավորման գործընթացին, եթե նա անտեսի որոշակի փաստեր եւ ճշմարտություններ, որոնք այդ երկիրը պարտավոր է ընդունել, եթե մենք ուզում ենք նորմալ հարաբերություններ ունենալ»,- նշել է նա։
Զարեհ Սինանյանը նաև բացատրել է, թե ինչու երբեք չի այցելել Իրան:
«Ես պետք է Իրան այցելեի 2019 թվականին, սակայն Իրանի դեսպանի խորհրդով այցը հետաձգվեց, քանի որ Իրանում պետք է անցկացվեին ընտրություններ։ Այցը հետաձգվեց մինչեւ 2020 թվականի մայիս։ Սակայն մարտին սկսվեց պանդեմիան, եւ Իրան այցն անհնարին դարձավ: Հետո սկսվեց պատերազմը։
2020 թվականի փետրվարից ես ոչ մի երկրում չեմ եղել, բացի Լիբանանից (Բեյրութում տեղի ունեցած պայթյունից հետո)։ Անպայման կգնամ Իրան։ Մենք մշտական կապի մեջ ենք իրանահայերի հետ, լավ հարաբերություններ ունենք նրանց հետ»,-նշեց նա։
