Google-ը, Facebook-ը և այլ խոշոր կազմակերպություններ հարկ կվճարեն. Բադասյան
ԱԺ-ում քննարկվում է «Հարկային օրենսգրքում» փոփոխություններ և լրացումներ կատարելու մասին օրինագիծը։
ՀՀ պետեկամուտների կոմիտեի նախագահ Ռուստամ Բադասյանն ասաց, որ օրինագծով ներդրվում է էլեկտրոնային ծառայությունների ԱԱՀ-ով հարկման նոր համակարգ։
Ռուստամ Բադասյանը նշեց, որ օրինագիծը բազմիցս քննարկվել է տարբեր հարթակներում։
«Ֆիզիկական անձանց կյանքում որևէ բան չի փոխվում։ Որևէ հավելյալ հարկային բեռ ֆիզիկական անձինք չեն կրում, այլ էլեկտրոնային հարթակի միջոցով ոչ ռեզիդենտ խոշոր կորպորացիաները, ինչպիսիք են օրինակ Google-ը և Facebook-ը, հնարավորություն են ստանում գրանցվել հարկային մարմնի կայքում և եռամսյակի կտրվածքով հաշվարկել ու վճարել ավելացված արժեքի հարկը բոլոր այն ծառայությունների մասով, որոնք մատուցվում են ֆիզիկական անձանց»,-ասաց Ռուստամ Բադասյանը։
Վերջինս նշեց, որ ծառայությունների ցանկը սահմանվելու է կառավարության որոշմամբ։ Դրանք կարող էլ լինել գովազդային ծառայություններ օնլայն հարթակում, էլեկտրոնային գրքեր, ֆիլմեր, շտեմարանների հասանելիության ապահովում կամ էլեկտրոնային ծրագրերի օգտագործման հետ կապված տարբեր ծառայություններ։
