Հարկ վճարողը պետք է ներկայացնի հարկային հաշվարկ․ Անանյան

Պետական եկամուտների կոմիտեի նախագահ Դավիթ Անանյանն ամփոփում է 2019թ․գործունեությունը՝ ներկայացնելով ցուցանիշներ։ Ըստ ՊԵԿ նախագահի՝ 2019թ․պետական բյուջեի հիմքում դրված է եղել 6 տրիլիոն 756 համախառն ներքին արդյունքի ցուցանիշ, որի 20, 75 %-ը ծրագրավորվել է որպես հարկային եկամուտներ։

«Սա նշանակում է, որ բոլորս իրար հետ 2019-ի ընթացքում գեներացրել ենք շուրջ 6,7 տրիլիոն համախառն ներքին արդյունք, որի 20,75 %-ը վերաբաշխվելու է հասարակության մեջ։ Այսինքն՝ մենք հարկեր ենք վճարելու և դրանց միջոցով սոցիալական ծրագրեր ենք իրականացնելու»,- ասաց ՊԵԿ նախագահը։

ՊԵԿ-ը 2019թ․ ԱԱՀ-ի գծով 42,8 մլրդ դրամ է վերադարձրել հարկ վճարողներին։ Ըստ Դավիթ Անանյանի՝ ամբողջական գումարը կազմել է 56,4 մլրդ դրամ։

«Այդ 56,4 մլրդի գծով 2020թ․ հունվարի 1-ի դրությամբ հարկ վճարողների հանդեպ պարտքը կազմում է 11,3 մլրդ, որից շուրջ 6 մլրդը ուսումնասիրությունների և ստուգումների արդյունքում հաստատվել է որպես ոչ ենթակա վերադարձման և նաև 2-3 դեպքով հարկ վճարողների նախկին վարքագծին տրվելու է քրեաիրավական գնահատական»,- տեղեկացրեց Դավիթ Անանյանը։

Դավիթ Անանյանը հիշեցրեց, որ հարկային եկամուտների փաստացի կատարողականի առումով 2018թ․հայտարարել էին հեղափոխական, ինչը արդարացված էր։

«Եթե դուք հիշում եք, մինչև 2018թ․ հունվարի 1-ը ընկած ժամանակահատվածի համար պետական բյուջեի հարկային եկամուտներ էին համարվում պետական բյուջե փաստացի վճարված հարկերը։ 2018թ․-ի ընթացքում մենք դրամարկղային մեթոդից անցում ենք կատարել կիսահաշվեգրման մեթոդին։ Սա նշանակում է, որ հարկ վճարողը պետք է ներկայացնի հարկային հաշվարկ, որում պետք է արտացոլված լինի հարկային պարտավորություն պետության հանդեպ, և եթե հարկային պարտավորությունը վճարվում է հարկ վճարողի կողմից, ապա այդ փաստացի հայտարարագրված և վճարված գումարն է համարվում հարկային եկամուտ և 2018թ․-ից սկսած մենք այդ ճանապարհով ենք գնացել»,- ասաց Դավիթ Անանյանը։