Հայ եկեղեցու կառույցներն արձագանքել են Կաթողիկոսի դատավարությանը

Ամենայն Հայոց Կաթողիկոս Գարեգին Բ-ի և վեց եպիսկոպոսների նկատմամբ դատավարության կապակցությամբ հայտարարություններով են հանդես եկել Հայ Առաքելական եկեղեցու տարբեր կառույցներ՝ մտահոգություն հայտնելով եկեղեցու ինքնավարության և պետություն-եկեղեցի հարաբերությունների վերաբերյալ:

Հայաստանյայց Առաքելական Սուրբ Եկեղեցու Արգենտինայի և Չիլիի թեմի կենտրոնական վարչությունը դատապարտել է դատավարությունը՝ այն որակելով որպես միջամտություն Եկեղեցու հոգևոր գործունեությանը և կրոնի ազատության ու եկեղեցի-պետություն տարանջատման սկզբունքների խախտում: Կառույցը ՀՀ կառավարությանը կոչ է արել զերծ մնալ հակաեկեղեցական քայլերից և խնդիրները լուծել փոխադարձ հարգանքի պայմաններում:

Երուսաղեմի Հայոց պատրիարքությունն իր հերթին ընդգծել է, որ Ամենայն Հայոց Կաթողիկոսի նկատմամբ Հայաստանի իշխանությունների վերաբերմունքը կարող է անդրադառնալ նաև Հայ եկեղեցու մյուս նվիրապետական աթոռների և հոգևոր առաջնորդների դիրքի վրա: Պատրիարքությունը ՀՀ պատկան մարմիններին կոչ է արել հարգել Սահմանադրությամբ երաշխավորված Հայ Առաքելական եկեղեցու ինքնավարությունը և խուսափել քայլերից, որոնք կարող են խորացնել ազգային պառակտումն ու վնասել պետություն-եկեղեցի հարաբերություններին:

Դատավարությանը կոշտ արձագանք է տվել նաև Ռուսաստանի և Նոր Նախիջևանի հայոց teme ը՝ օգոստոսի 7-ը որակելով «ամոթի ու դավաճանության օր»: Թեմի հայտարարությունում դատավարությունը ներկայացվում է որպես Եկեղեցու և հոգևորականության նկատմամբ ճնշում: Թեմական խորհուրդն ու հոգևորականաց դասը նաև իրենց աջակցությունն են հայտնել Գարեգին Բ Ամենայն Հայոց Կաթողիկոսին և դատավարության մեջ ներգրավված հոգևորականներին: