Հայաստանին տրվել է բացառիկ շանս լինել էներգետիկ առումով անկախ. Փաշինյան

Վարչապետ Նիկոլ Փաշինյանը «Երևանի կայուն էներգիայի օրեր»-ի շրջանակում հանդիպել է «Երիտասարդությունը՝ հանուն Հայաստանի գիտահեն ապագայի» խորագրով միջոցառման մասնակիցներին։ Նա նաև պատասխանել է երիտասարդների հարցերին։

Փաշինյանի հարց է ուղղել «Հայկական ստեղծարար տեխնոլոգիաների» (ACT) քոլեջի ուսանող Նարեկ Մկրտչյանը․ «Հարգելի´ պարոն վարչապետ, ձեզ ցանկանում էի մի հարց ուղղել: Հայաստանը ակտիվորեն զարգացնում է էներգետիկ ոլորտը: Ի՞նչ դեր կարող են ունենալ ինժեներական քոլեջի ուսանողները, օրինակ՝ մեր քոլեջի, այս գործընթացում և ինչպե՞ս կարող է պետությունն աջակցել նման նախաձեռնություններին»: Ի պատասխան Փաշինյանը նշել է, որ Հայաստանի Հանրապետությունում կա ատոմային էլեկտրակայան, որը էլեկտրաէներգիայի գործող ամենահզոր կենտրոնն է, և իր կարողությունը 400 մեգավատ է: «2018 թվից հետո՝ վերջին տարիներին, Հայաստանում ձևավորվել է 1200 մեգավատ արևային էլեկտրական էներգիայի արտադրության կարողություն, այսինքն՝ 2,5 ատոմակայան. Արևային էներգետիկան այս պրոբլեմն ունի. երբ արև կա՝ կա, երբ արև չկա՝ չկա: Կամ կարելի է ասել՝ ցերեկը կա, գիշերը՝ ոչ։ Օրինակ, իմ քաղաքական գնահատականն այն է, որ այս տեխնոլոգիան Հայաստանի Հանրապետությանը տրվել է բացառիկ շանս լինել էներգետիկ առումով անկախ պետություն, որովհետև մեր արևային կարողությունները... լսել եք, չէ՞, «արևի երկիր Հայաստան»: Սա հիմա մենք կարող ենք այս «արևի երկիր Հայաստանը» նախադասությունը տրանսֆորմացնել էներգետիկ առումով անկախ Հայաստանի: Այստեղ մեր խնդիրը հետևյալն է՝ բա գիշերվա հարցը ո՞նց լուծել? Եվ մեր ինժեներական միտքը պետք է այս ուղղությամբ աշխատի»,-նշել է վարչապետը:

Նրա խոսքով՝ էներգետիկ ոլորտում այժմ շատ աշխատատեղեր են ստեղծվում, քանի որ զարգանում են նաև կարողությունները․ «Ես ուրախ եմ և քաջալերում եմ այդ ուղղությամբ գիտելիքը և կրթությունը զարգացնել, և մտածել նաև, թե ինչպես կարելի է լուծել այս հարցերը»։